Mystery Well: ઉત્તર પ્રદેશના કૌશામ્બી કિલ્લામાં એક એવો પ્રાચીન કૂવો છે, જેનું રહસ્ય આજે પણ અકબંધ છે. લોકો કહે છે કે આ કૂવામાં અદ્રશ્ય શક્તિઓનો વાસ છે. અહીં બનતી ચમત્કારી ઘટનાઓ જાણીને ભલભલા વિજ્ઞાનીઓ પણ વિચારમાં પડી ગયા છે.
કૂવાની અજીબ બનાવટ અને જાદુ
સ્થાનિક લોકવાયકા મુજબ આ કૂવાની બનાવટ અત્યંત વિચિત્ર છે. જો કોઈ વ્યક્તિ કૂવાના બે કિનારા પર પગ ફેલાવીને ઊભો રહેવાની કોશિશ કરે, તો તેનું શરીર આપોઆપ મોટું થવા લાગતું હતું. લોકોને એવું લાગતું કે જાણે કૂવાની પહોળાઈ મુજબ વ્યક્તિનું કદ પણ વધી રહ્યું છે. આ ભયાનક છતાં આશ્ચર્યજનક અનુભવને કારણે તેને ‘ચમત્કારી કૂવો’ કહેવામાં આવે છે.
રહસ્યમય રોશની અને અવાજોનો ડર
વર્ષો પહેલા આ કૂવામાંથી અચાનક રોશની નીકળતી હોવાના દાવા થયા છે. દિવસ હોય કે રાત, કૂવાની અંદરથી હળવો પ્રકાશ અને વિચિત્ર અવાજો સંભળાતા હતા. કેટલાક લોકોએ કૂવાની અંદરથી ઘંટડીઓ વાગવાનો અવાજ પણ સાંભળ્યો છે. પાણીમાં ચંદ્રના પ્રતિબિંબને બદલે વિચિત્ર આકૃતિઓ દેખાતી હોવાની વાતો આજે પણ લોકોમાં ચર્ચાય છે.
રાજા પરીક્ષિતના કાળ સાથે જોડાણ
કહેવાય છે કે આ કૂવાનું નિર્માણ રાજા પરીક્ષિતના શાસનકાળ દરમિયાન થયું હતું. યુદ્ધના સમયે કિલ્લાના સૈનિકો માટે આ કૂવો જીવનરેખા સમાન હતો. સ્થાનિકો જણાવે છે કે કૂવાની અંદર પગ ફેલાવીને જાદુ જોવાની કોશિશમાં અનેક દુર્ઘટનાઓ પણ બની છે. આ ડરને લીધે લોકો હવે કૂવાની અંદર જોતા પણ ગભરાય છે.
અનંત ઊંડાઈનું વણઉકલ્યું રહસ્ય
કૂવાની સાચી ઊંડાઈ કેટલી છે તે આજે પણ એક સવાલ છે. ઘણા લોકોએ લાંબી રસીઓ અને કેબલ નાખીને તેની ઊંડાઈ માપવા પ્રયત્નો કર્યા. પરંતુ કોઈને પણ તળિયું મળ્યું નથી. આજે પણ આ કૂવો ઇતિહાસ પ્રેમીઓ અને સંશોધકો માટે કુતૂહલનો વિષય છે. તે કૌશામ્બીના ગૌરવશાળી ઇતિહાસનો મૂક સાક્ષી બનીને ઊભો છે.