ઉત્તરાયણનો તહેવાર આનંદનો તહેવાર છે, પણ પતંગ ચગાવતા કેટલાંક લોકોની બેદરકારીથી સામાન્ય લોકો પર આપત્તિ આવે તેવી ઘટનાઓ પણ છેલ્લાં કેટલાંક વર્ષોમાં જાણવા મળી છે. આવી જ એક કરુણ ઘટના વડોદરાના યુવક સાથે બની કે જેમાં પતંગની દોરીથી બચવા તે વાહન લઈને નીકળવાની જગ્યાએ ચાલતો બહાર ગયો હતો પણ એક વાહનની અડફેડે તેનું મોત નીપજ્યું છે. મળતી માહિતી મુજબ, વડોદરા શહેરમાં રહેતા અને પોતાના ઘર નજીક મિત્રને મળવા જવાનું કહીને સાંજે બહાર નીકળેલા ૨૭ વર્ષીય જયને તેના પિતાએ બાઈક લઈને જવાની સલાહ આપી હતી. પરંતુ, ઉત્તરાયણના તહેવારમાં પતંગની દોરી વચ્ચે આવવાથી કદાચ અકસ્માત થાય તેના કરતાં ચાલતા જવાનું યોગ્ય સમજીને ચાલતા ઘરની બહાર નીકળેલા જય ઠક્કર નામના યુવકને રોડ ક્રોસ કરતી વખતે હાઈવે ઉપર એક અજાણ્યા વાહને અડફેટે લેતા તેનું મોત નીપજ્યું હતું.
વડોદરામાં ઘરેથી ચાલતા મિત્રને મળવા જતા ૨૭ વર્ષીય એન્જિનિયર યુવકને એક અજાણ્યા વાહને અડફેટે લેતાં તેનું ઘટનાસ્થળે મોત નીપજ્યું હતું. વધુ મળતી માહિતી મુજબ, વડોદરામાં આજવા ચોકડીથી વાઘોડિયા ચોકડીની વચ્ચે આવેલી એલએન્ડટી કંપનીની સામે રસ્તો ઓળંગતા યુવકને અજાણ્યા વાહનચાલકે અડફેટે લેતા તેનું સ્થળ પર જ મોત થયું હતું.
વડોદરાના આજવા રોડમાં રહેતા રાજેશકુમાર ઠક્કર ઈન્ડસ્ટ્રિયલ સિક્યુરિટી સર્વિસ ચલાવે છે. તેમનો ૨૭ વર્ષીય પુત્ર જય ઠક્કર ઉત્તરાયણની સાંજે સાડા સાત વાગ્યે ઘરેથી ચાલતો મિત્રને મળવા માટે નીકળ્યો હતો. તે દરમિયાન વાઘોડિયા ચોકડીથી આજવા ચોકડી જવાના હાઈવે પર એલએન્ડટી કંપની પાસે કોઈ વાહનચાલકે તેને અડફેટે લેતા તેનું સ્થળ પર જ કરુણ મોત થયું હતું. જે અંગે રાજેશકુમાર ઠક્કરને જાણ થતાં કરતા તેઓ ઘટનાસ્થળ પર પહોંચી ગયા હતા. બનાવ અંગે બાપોદ પોલીસે ગુનો દાખલ કરીને કાયદેસરની કાર્યવાહી હાથધરી છે.
સમગ્ર ઘટના અંગે તપાસ કરી રહેલા બાપોદ પોલીસના અધિકારીઓ પણ પરિવારજનોની પૂછપરછ કરવાની હિંમત એકત્રિત કરી શક્યા નહોતા. કારણકે, ૨૭ વર્ષીય યુવકના મૃત્યુના કારણે તેના માતા-પિતાની તબિયત લથડી હતી. જ્યારે યુવકના પોસ્ટમોર્ટમ બાદ તેનો મૃતદેહ પણ તેના કાકાને સોંપવામાં આવ્યો હતો. પરિવારજનો સ્વસ્થ થયા બાદ પોલીસ દ્વારા આગળની કાર્યવાહી કરવામાં આવશે તેમ જાણવા મળ્યું હતું.