શોખ બડી ચીઝ હૈ… આ વાત તમે સાંભળી હશે પણ રાજકોટમાં બે યુવાનોએ આ વાતને સાર્થક કરી બતાવી છે. સચિનના ફેન તો વિશ્વામાં તમે ઘણા જોયા હશે પણ રાજકોટના આ યુવાન જય ભાસ્કર ત્રિવેદી જેવા ખુબ ઓછા જોયા હશે, કારણ કે જય ભાસ્કર ત્રિવેદી છેલ્લા 17 વર્ષથી રાહ જોતા હતા કે ક્યારે તે સચિનને મળી શકે. આખરે આ વર્ષે તેમનું સપનું પુરુ થયું અને સાથે જ રાજકોટનો સેલ્ફીમેન હેમલ જાજલ પણ તેની સાથે જોડાયો.
રાજકોટના બે યુવાનો જય ભાસ્કર ત્રિવેદી અને હેમલ જાજલ તારીખ 21 એપ્રિલના રોજ રાજકોટથી મુંબઈ જવા રવાના થયા હતા અને 22એ સવારે સચિનના ઘરની સામે પહોંચી ગયા હતા. તેઓના હાથમાં એક પોસ્ટર હતું અને એમાં લખ્યું હતું કે જબ તક સુરજ ચાંદ રહેગા, સચિન તેંદુલકર તુમ્હારા નામ રહેગા… જય ભાસ્કર ત્રિવેદીએ જણાવ્યું કે હું છેલ્લા 17 વર્ષથી સચિનને મળવા માટે તલપાપડ હતો, આ વખતે નક્કી કરી જ લીધું હતું કે ગમે તે થાય મળીને જ આવવું. આખરે જય ભાસ્કર ત્રિવેદીનું સપનું પુરુ થયું અને સચિન તેંદુલકર પોતાના ઘરે રાજકોટના આ બન્ને યુવાનોને મળ્યા હતા.
જય ભાસ્કર ત્રિવેદી રાજકોટ ખાતે બેન્કમાં નોકરી કરે છે. છેલ્લા 30 વર્ષથી તે અલગ અલગ સેલેબ્રિટી જોડે ફોટો પડાવે છે. અત્યાર સુધીમાં 15000 કરતાં પણ વધારે સેલેબ્રિટી જોડે ફોટો પડાવ્યા છે. તો વળી હેમલ જાજલ કંકુના કારખાના ચલાવે છે અને છેલ્લા 5 વર્ષથી સેલેબ્રિટી જોડે ફોટો પડાવે છે. તેણે પણ અત્યાર સુધીમાં 2000 સેલેબ્રિટી સાથે ફોટો પડાવ્યા છે.