તંત્રને લાંચ લેવાના કેસમાં વધુ એક સફળતા મળી છે. છટકુ ગોઠવીને ગાંધીનગર મહાનગર પાલિકાના ફાયર ઓફિસર મહેશ મોડને પાંચ લાખ રૂપિયાની લાંચ લેતા ઝડપી પાડ્યા હતા. મહેશ મોડે ફાયર પ્લાન મંજૂર કરાવવા માટે પાંચ લાખની લાંચ માગી હતી. આ લાંચ કેસમાં મહેશ મોડના સાળાએ મહત્વની ભૂમિકા ભજવી હોવાનો પણ ખુલાસો થયો છે. પ્રાપ્ત રિપોર્ટ મુજબ, મહેશ મોડ લાંબા સમયથી ગાંધીનગર મનપામાં ફાયર ઓફિસર તરીકે ફરજ બજાવતા હતા. મહેશ મોડ પર આરોપ છે કે, તેમણે ફાયર પ્લાન મંજૂર કરાવવા માટે પાંચ લાખ રૂપિયાની માગણી કરી હતી.
એ પછી પીડિતે લાંચ આપવાના બદલે એન્ટી કરપ્શન બ્યૂરોનો સંપર્ક કર્યો હતો. ફરિયાદની ફરિયાદ બાદ એસીબીની ટીમે છટકુ ગોઠવ્યુ હતુ. એસીબીના છટકામાં ફાયર ઓફિસર મહેશ મોડ પાંચ લાખની લાંચ લેતા રંગે હાથ ઝડપાઈ ગયા હતા. ફાયર ઓફિસર લાંચ લેતા ઝડપાયા હોવાની વાત વાયુ વેગે વિભાગમાં ફેલાઈ ગઈ હતી. એ પછી આ વિષય ચર્ચાનો મુદ્દો બન્યો હતો. આ લાંચ કેસમાં મહેશ મોડના સાળાની પણ સંડોવણી બહાર આવી છે. ફાયર ઓફિસર મહેશ મોડે પોતાની ફરજ દરમિયાન પ્રશંસનીય સેવાઓ આપી હતી.
જેને ધ્યાનમાં રાખીને તેમને રાષ્ટપતિ ચંદ્રક એનાયત કરવામાં આવ્યો હતો. વર્ષ ૧૯૯૭થી ૨૦૦૨ દરમિયાન મહેશ મોડ સુરતમાં મ્યુનિસિપલ કોર્પોરેશનમાં ફાયર ઓફિસર હતા. એ પછી તેની બદલી ગાંધીનગર ફાયર ઓફિસર તરીકે કરવામાં આવી હતી. એટલું જ નહીં ભૂજ ધરતીકંપ અને અક્ષરધામ હુમલા વખતે પણ મહેશ મોડે સરાહનીય કામગીરી કરી હતી. આ કામની નોંધ પણ લેવામાં આવી હતી. બાદમાં ૨૬ જાન્યુઆરી, ૨૦૧૩માં રાષ્ટપતિ ચંદ્રક પણ એનાયત કરવામાં આવ્યો હતો.
જાે કે, હાલ તો એસીબીએ આ કેસમાં મહેશ મોડની વધુ પૂછપરછ હાથ ધરવામાં આવી છે. મહત્વનું છે કે, તાજેતરમાં જ સુરત ફાયર બ્રિગેડના ફાયર ઓફિસર બેચરભાઈ સોલંકી પણ એસીબીના છટકામાં લાંચ લેતા ઝડપાયા હતા. બેચરભાઈ સોલંકીએ એનઓસી આપવાની એવજમાં રૂપિયા ૩૦ હજારની લાંચ માગી હતી. એસીબીએ લાંચની રકમ લેતા રંગેહાથ ઝડપી પાડ્યા હતા. ત્યારે હવે ગાંધીનગર મહાનગર પાલિકાના ફાયર ઓફિસર પાંચ લાખની લાંચ લેતા રંગે હાથ ઝડપાતા ચકચાર મચી જવા પામી છે.