ધંધૂકા નજીક આવેલા વતન ચચાણા ગામે આજે કિશનની ઉત્તરક્રિયા કરવામાં આવી હતી. આ દરમિયાન પરિવાર, સગાં-સંબંધીઓ અને માલધારી સમાજના લોકો આવ્યા હતા. કિશનનો નાનો ભાઇ ઉત્તરક્રિયાની વિધિ માટે બેઠો હતો. જ્યારે બીજી તરફ આ કરુણ ઘડીએ કિશનની પત્ની રડી રડીને બેહાલ થઇ ગઇ હતી. કિશનના પિતા આજે તેમના મૃતક દીકરાના માળા ચડેલા ફોટા પાસે ગમગીન થઈને બેઠા છે અને ન્યાયની આશા લગાવી રહ્યા છે.કિશનના સસરા જેસિંગભાઇ વડોદરાથી ધંધૂકાના ચચાણા ખાતે જમાઈની ઉત્તરક્રિયામાં પહોંચ્યા હતાં. કિશનના નાનાભાઈએ ઉત્તરક્રિયાની વિધિ કરી હતી.
ધંધૂકામાં વિવાદાસ્પદ ફેસબુક પોસ્ટ બાદ કિશન ભરવાડની વિધર્મીઓ દ્વારા ગોળી મારી હત્યા કરવામાં આવી હતી. કિશનના વતન ચચાણામાં આજે તેનું બારમું છે અને સમગ્ર પરિવાર તેમજ સંબંધીઓ શોકમગ્ન છે.કિશનની પત્ની અને અન્ય મહિલાઓના આક્રંદ તેમજ આંસુથી પથ્થર પણ પીગળી જાય એવો ગમગીન માહોલ બન્યો હતો. આમ તો આજે વસંતપંચમી છે અને રાજ્ય સહિત બધે જ લગ્નના મંગળિયા ગવાઇ રહ્યા હશે, ત્યારે દોઢ વર્ષના લગ્ન જીવનમાં જ કિશનની પત્નીની વસંત ઊજડી ગઇ અને આજે પતિની ઉત્તરક્રિયામાં મરશિયા ગવાયા હતા.ધંધૂકા-લીંબડી હાઇવે પર આવેલા ચચાણામાં આજે માહોલ ગમગીન છે. કિશનના પિતા શિવાભાઇ અને સંબંધીઓ તેમજ માલધારી સમાજ કિશનના બારમામાં આવી તેના પિતા અને પરિવારને શાંત્વના આપી રહ્યો છે.