T20WorldCup2026: T20 વર્લ્ડ કપ 2026 વચ્ચે ભારતીય છાવણીમાંથી ચિંતાજનક સમાચાર આવ્યા છે. વિસ્ફોટક ઓપનર અભિષેક શર્માને પેટમાં ઇન્ફેક્શન થતાં દિલ્હીની ખાનગી હોસ્પિટલમાં દાખલ કરવામાં આવ્યા છે, જેના કારણે નામિબિયા સામેની મેચમાં તેમનું રમવું શંકાસ્પદ છે.
હોસ્પિટલમાં દાખલ અને મેડિકલ ટેસ્ટ
25 વર્ષીય અભિષેક શર્મા સોમવારથી હોસ્પિટલમાં સારવાર હેઠળ છે. પેટમાં ઇન્ફેક્શન (Stomach Infection) ને કારણે તેઓ મંગળવારે પ્રેક્ટિસ સેશનમાં પણ ભાગ લઈ શક્યા નહોતા. આસિસ્ટન્ટ કોચ રયાન ટેન ડોશેટે પુષ્ટિ કરી છે કે અભિષેક અત્યારે ડોક્ટરોની દેખરેખ હેઠળ છે. વધુ કેટલાક રિપોર્ટ્સ આવ્યા બાદ જ તેમના રમવા અંગે અંતિમ નિર્ણય લેવામાં આવશે.
તબિયત લથડવાનું કારણ
અભિષેક શર્મા અગાઉ અમેરિકા સામેની મેચમાં પણ ભારે તાવ હોવા છતાં રમ્યા હતા. એ મેચમાં તેઓ શૂન્ય રને આઉટ થયા હતા અને બીજી ઇનિંગમાં ફિલ્ડિંગ કરવા પણ ઉતરી શક્યા નહોતા. હવે ઇન્ફેક્શન વધતા મેનેજમેન્ટે તેમને હોસ્પિટલમાં દાખલ કરવાનો નિર્ણય લીધો છે. 15 ફેબ્રુઆરીએ પાકિસ્તાન સામે હાઈ-વોલ્ટેજ મેચ હોવાથી ટીમ મેનેજમેન્ટ કોઈ જોખમ લેવા માંગતું નથી.
કોણ લેશે અભિષેકનું સ્થાન?
જો અભિષેક શર્મા નામિબિયા સામેની મેચમાંથી બહાર રહે છે, તો સંજુ સેમસનને તક મળી શકે છે. સેમસન ઈશાન કિશન સાથે ઓપનિંગમાં ઉતરી શકે છે. મંગળવારે પ્રેક્ટિસ દરમિયાન સેમસને નેટ્સમાં ઘણો સમય વિતાવ્યો હતો. ભારત હવે ગુરુવારે નામિબિયા સામે ટકરાશે, જે પહેલા બુધવારે સાંજે ટીમ વધુ એક પ્રેક્ટિસ સેશન યોજશે.