ICC T 20 World Cup: T 20 વર્લ્ડ કપ 2026 પહેલા ભારત અને પાકિસ્તાન વચ્ચેના ક્રિકેટ સંબંધોમાં ફરી એકવાર ગરમાવો આવ્યો છે. પાકિસ્તાને ભારત સામે રમવા માટે મૂકેલી શરતોને આઈસીસી (ICC) એ ફગાવી દીધી છે. આ વિવાદને કારણે ૧૫ ફેબ્રુઆરીએ યોજાનારી હાઈ-વોલ્ટેજ મેચ પર સંકટના વાદળો છવાયા છે.
પાકિસ્તાનની શરતો અને ICCનો ઈનકાર
રવિવારે મળેલી મહત્વની બેઠકમાં પાકિસ્તાન ક્રિકેટ બોર્ડે ભારત સામે રમવા માટે કેટલીક આકરી શરતો રાખી હતી. પાકિસ્તાનની માંગ હતી કે ભારત સાથે ફરીથી દ્વિપક્ષીય શ્રેણી (Bilateral Series) શરૂ કરવામાં આવે. આ ઉપરાંત, તેમણે ભારત, પાકિસ્તાન અને બાંગ્લાદેશ વચ્ચે ટ્રાય-સીરીઝ યોજવાનો પ્રસ્તાવ પણ મૂક્યો હતો. જોકે, આઈસીસીએ સ્પષ્ટપણે આ માંગણીઓને ફગાવી દીધી છે અને પાકિસ્તાનને પોતાનું વલણ સ્પષ્ટ કરવા એક દિવસનો સમય આપ્યો છે.
રાજકીય ગૂંચવણ અને બહિષ્કારની ધમકી
પાકિસ્તાન સરકારે અગાઉ સોશિયલ મીડિયા દ્વારા સંકેત આપ્યો હતો કે તેમની ટીમ ભારત સામે નહીં રમે. વડાપ્રધાન શાહબાઝ શરીફે આ નિર્ણયને બાંગ્લાદેશના સમર્થનમાં લીધેલો ગણાવ્યો હતો અને આઈસીસી પર પક્ષપાતનો આરોપ લગાવ્યો હતો. હાલ પાકિસ્તાનના ગૃહમંત્રી અને પીસીબી ચીફ મોહસિન નકવી આ મામલે સરકાર સાથે ચર્ચા કરી રહ્યા છે. સોમવાર સાંજ અથવા મંગળવાર સુધીમાં ભારત-પાક મેચના ભાવિ અંગે સત્તાવાર જાહેરાત થઈ શકે છે.
ક્રિકેટ જગતમાં ભારે ઉત્તેજના
આ વિવાદમાં બાંગ્લાદેશ ક્રિકેટ બોર્ડના અધ્યક્ષ પણ જોડાયા હતા, કારણ કે પાકિસ્તાને વર્લ્ડ કપમાંથી બાંગ્લાદેશને હટાવવા સામે મત આપ્યો હતો. ભારત અને પાકિસ્તાન વચ્ચે 2012-13 પછી કોઈ દ્વિપક્ષીય શ્રેણી રમાઈ નથી, માત્ર આઈસીસી ટૂર્નામેન્ટમાં જ બંને ટીમો સામસામે આવે છે. જો પાકિસ્તાન પોતાની માંગ પર અડી રહેશે, તો વર્લ્ડ કપના શિડ્યુલમાં મોટો ફેરફાર થઈ શકે છે, જેની સીધી અસર ટૂર્નામેન્ટની લોકપ્રિયતા પર પડશે.