T 20 WC: T20 વિશ્વકપમાં શ્રીલંકાએ મોટો ઉલટફેર કરતા ઓસ્ટ્રેલિયાને 8 વિકેટે પરાજય આપ્યો છે. પથુમ નિસાંકાની તોફાની સદીની મદદથી શ્રીલંકાએ સુપર-8માં પોતાની જગ્યા પાકી કરી લીધી છે.
કાંગારૂઓનું 181 રનનું લક્ષ્ય શ્રીલંકાએ આસાનીથી વટાવ્યું
શ્રીલંકા સામે જીતવા માટે 182 રનનો લક્ષ્યાંક હતો, જે ટીમે માત્ર 18 ઓવરમાં 2 વિકેટ ગુમાવીને હાંસલ કરી લીધો હતો. આ જીત સાથે શ્રીલંકાનું સુપર-8માં સ્થાન નિશ્ચિત બન્યું છે. બીજી તરફ, આ હાર બાદ હવે ઓસ્ટ્રેલિયા માટે ટૂર્નામેન્ટમાં આગળ વધવું મુશ્કેલ બન્યું છે. સમીકરણો મુજબ, આ ગ્રુપમાંથી શ્રીલંકાની સાથે ઝિમ્બાબ્વેની ટીમ સુપર-8માં પહોંચી શકે છે.
પથુમ નિસાંકાનું વિસ્ફોટક શતક
શ્રીલંકાની જીતનો અસલી હીરો ઓપનર પથુમ નિસાંકા રહ્યો હતો. નિસાંકાએ માત્ર 52 બોલમાં અણનમ 100 રન ફટકારીને ઓસ્ટ્રેલિયન બોલરોની લાઇન-લેન્થ બગાડી નાખી હતી. તેણે પોતાની ઇનિંગમાં 10 ચોગ્ગા અને 5 છગ્ગા માર્યા હતા. તેને કુસલ મેન્ડિસનો સાથ મળ્યો, જેણે 51 રનનું યોગદાન આપ્યું. પવન રત્નાયકેએ પણ અંતમાં 15 બોલમાં 28 રન ફટકારી જીત ઝડપી બનાવી હતી.
ઓસ્ટ્રેલિયાની બેટિંગ: માર્શ અને હેડની ફિફ્ટી એળે ગઈ
પ્રથમ બેટિંગ કરતા ઓસ્ટ્રેલિયાએ 20 ઓવરમાં 181 રન બનાવ્યા હતા. કેપ્ટન મિશેલ માર્શે 27 બોલમાં 54 રન અને ટ્રેવિસ હેડે 29 બોલમાં 56 રન બનાવ્યા હતા. બંને વચ્ચે 100 રનથી વધુની ભાગીદારી થઈ હતી, પરંતુ મધ્યક્રમ નિષ્ફળ રહ્યો હતો. ઓસ્ટ્રેલિયાની આખી ટીમ 20 ઓવરમાં ઓલઆઉટ થઈ ગઈ હતી. શ્રીલંકાની શિસ્તબદ્ધ બોલિંગ સામે માર્કસ સ્ટોઇનિસ સિવાય કોઈ ઓસ્ટ્રેલિયન બોલર વિકેટ ઝડપી શક્યો નહોતો.