અમદાવાદ: અમદાવાદની અંદાજે 12 નામી શાળાઓને બોમ્બથી ઉડાવી દેવાના ધમકીભર્યા ઈમેલ મળતા હડકંપ મચી ગયો છે. પ્રજાસત્તાક પર્વે તિરંગો ન ફરકાવવાની ચેતવણી સાથેના આ ઈમેલ બાદ પોલીસે શાળાઓમાં સઘન સર્ચ ઓપરેશન હાથ ધર્યું હતું.
ઈમેલથી ફેલાયો દહેશતનો માહોલ
શુક્રવારે સવારે શહેરની પ્રતિષ્ઠિત શાળાઓને એક નનામો ઈમેલ મળ્યો હતો. આ ઈમેલમાં દાવો કરાયો હતો કે બપોરે 1:11 વાગ્યે શાળાઓમાં વિસ્ફોટ થશે. ધમકી મળતા જ ડીપીએસ, આર્મી સ્કૂલ અને મહાત્મા ગાંધી ઈન્ટરનેશનલ સ્કૂલ જેવી સંસ્થાઓમાં અફરાતફરી મચી ગઈ હતી. સાવચેતીના ભાગરૂપે શાળાઓમાં તુરંત રજા જાહેર કરી દેવામાં આવી હતી.
પોલીસનું મેગા સર્ચ ઓપરેશન
ધમકીની જાણ થતા જ અમદાવાદ પોલીસ અને બોમ્બ ડિસ્પોઝલ સ્ક્વોડ (BDS) એક્શનમાં આવી હતી. ડોગ સ્ક્વોડની મદદથી દરેક શાળાના ખૂણેખૂણાની તપાસ કરવામાં આવી હતી. કલાકો સુધી ચાલેલી તપાસ બાદ પોલીસને કોઈ શંકાસ્પદ વસ્તુ મળી ન હતી. ડીસીપી રાહુલ ત્રિપાઠીએ પુષ્ટિ કરી છે કે આ તમામ ઈમેલ ‘ફેક’ એટલે કે અફવા સાબિત થયા છે.
ઈમેલમાં શું લખ્યું હતું?
ધમકીભર્યા ઈમેલમાં ઉશ્કેરણીજનક લખાણ લખવામાં આવ્યું હતું. તેમાં 26 જાન્યુઆરીએ તિરંગો ન ફરકાવવાની ચીમકી આપવામાં આવી હતી. ઈમેલમાં PM મોદી અને અમિત શાહનો ઉલ્લેખ કરીને ‘ખાલિસ્તાન-બાંગ્લાદેશ ઝિંદાબાદ’ ના નારા લખાયા હતા. આ પ્રકારના ઈમેલથી વાલીઓમાં ભારે ચિંતા અને ગભરાટ જોવા મળ્યો હતો.
સાયબર ક્રાઈમ કરશે તપાસ
પોલીસના જણાવ્યા અનુસાર, આ માત્ર ડર ફેલાવવાનું ષડયંત્ર હોઈ શકે છે. હવે શહેરની સાયબર ક્રાઈમ બ્રાન્ચ આ મામલે FIR નોંધીને તપાસ કરશે. આ ઈમેલ ક્યાંથી અને કોણે મોકલ્યો છે તેની ટેકનિકલ તપાસ શરૂ કરી દેવામાં આવી છે. પ્રજાસત્તાક પર્વને ધ્યાનમાં રાખીને શહેરભરમાં સુરક્ષા વ્યવસ્થા પણ વધુ સઘન બનાવી દેવામાં આવી છે.