Gandhinagar: શિક્ષણ અને સંશોધન ક્ષેત્રે અગ્રેસર ગાંધીનગર યુનિવર્સિટી દ્વારા તાજેતરમાં આંતરરાષ્ટ્રીય પરિષદ ICET–2025 (International Conference on Emerging Technologies) નું સફળ આયોજન કરવામાં આવ્યું હતું. જેમાં ટેકનોલોજીના બદલાતા પ્રવાહોને સમજવા અને વૈશ્વિક સંશોધનોને પ્રોત્સાહન આપવા માટે ઉદયમાન ક્ષેત્રો પર ગહન ચર્ચાઓ કરવામાં આવી હતી.
તારીખ ૨૩ અને ૨૪ ડિસેમ્બર, ૨૦૨૫ દરમિયાન યોજાયેલી આ પરિષદમાં ૫૦૦થી વધુ ઉત્સાહી વિદ્યાર્થીઓ અને ૨૦૦થી વધુ વિદેશી પ્રતિનિધિઓએ સક્રિયપણે ભાગ લીધો હતો. આ મંચ પર વિવિધ ટેકનિકલ સેશન્સ અને રિસર્ચ પેપર પ્રસ્તુતિઓ યોજાઈ હતી, જેમાં સંશોધકોએ પોતાની નવીનતમ શોધો રજૂ કરી હતી. આ આયોજન વૈશ્વિક સ્તરે શૈક્ષણિક અને સંશોધન સહકાર માટે એક સીમાચિહ્ન સમાન સાબિત થયું હતું.
તજજ્ઞોનું માર્ગદર્શન અને સેશન ચેર
પરિષદની ગુણવત્તા અને ટેકનિકલ પાસાઓને સુનિશ્ચિત કરવા માટે વિવિધ યુનિવર્સિટીના દિગ્ગજ શિક્ષણવિદોએ સેશન ચેર તરીકે સેવાઓ આપી હતી, જેમાં સ્વામિનારાયણ યુનિવર્સિટીના ડીન ડૉ. વિજયકુમાર ગઢવી, રાય યુનિવર્સિટીના ડીન ડૉ. જયકુમાર દવે, SSIT ભાટ વડા વિભાગના ડૉ. રમેશ પ્રજાપતિ, સાંકળચંદ પટેલ યુનિવર્સિટીના પ્રોફેસર ડૉ. મનીષ પટેલ ઉપસ્થિત રહ્યા હતા.
આંતરરાષ્ટ્રીય સલાહકાર મંડળનું યોગદાન
પરિષદને આંતરરાષ્ટ્રીય સ્તરે પ્રતિષ્ઠા અપાવવામાં ઈરાન, યુકે અને યુએસએના નિષ્ણાતોનું મહત્વનું માર્ગદર્શન મળ્યું હતું. ઇરાનની ઇસ્લામિક આઝાદ યુનિવર્સિટીના ડૉ. કોલામરેઝા કાકામનશાદી, લંડનની સેન્ટ મેરીઝ યુનિવર્સિટીના ડૉ. હર્ષિલ જોષી, યુકેની નોર્થમ્બ્રિયા યુનિવર્સિટીના ડૉ. સારનીલ પંડ્યા તેમજ યુએસએના જાણીતા ટેક લીડર્સ ઉપેન્દ્ર પટેલ (CEO, AaNeel Info Tech) અને મનીષ પટેલે (TCS, ફ્લોરિડા) એડવાઇઝરી બોર્ડ તરીકે અમૂલ્ય યોગદાન આપ્યું હતું.
સફળ નેતૃત્વ અને ગૌરવપૂર્ણ ઉપસ્થિતિ
સમગ્ર પરિષદનું આયોજન ગાંધીનગર યુનિવર્સિટીના પ્રિન્સિપાલ ડૉ. દુષ્યંતસિંહ રાઠોડના કુશળ નેતૃત્વ હેઠળ સંપન્ન થયું હતું. આ પ્રસંગે યુનિવર્સિટીના પ્રેસિડેન્ટ હરેશભાઈ રોહેરા, વાઈસ પ્રેસિડેન્ટ માનનીય શ્રીમતી વિનિતા રોહેરા, કુલપતિ ડૉ. કમલેશ વી. એન. અને તમામ ફેકલ્ટીના ડીનો ઉપસ્થિત રહ્યા હતા. મહાનુભાવોએ આ પરિષદને વિદ્યાર્થીઓના ઉજ્જવળ ભવિષ્ય અને વૈશ્વિક ટેકનોલોજીના આદાન-પ્રદાન માટે અત્યંત જરૂરી ગણાવી હતી.