રિસોર્ટ શા માટે તોડવામાં આવ્યો, ત્યા જ તો તમામ પુરાવા હતા? અંકિતા ભંડારીના પરિવારે દીકરીના અંતિમ સંસ્કાર કરવાની પાડી દીધી ના, કરી આ માંગો

Lok Patrika
Lok Patrika
3 Min Read
Share this Article

અંકિતા ભંડારી હત્યા કેસના કારણે લોકોમાં ગુસ્સો છે. ઉત્તરાખંડની દીકરી અંકિતાને ન્યાય મળે તે માટે ઠેર-ઠેર લોકો મેદાને આવ્યા છે. આ દરમિયાન અંકિતાનો મૃતદેહ આજે સવારે શ્રીનગર (ઉત્તરાખંડ) પહોંચ્યો હતો જ્યાં આજે તેના અંતિમ સંસ્કાર થવાના હતા. પરંતુ પરિવારે અંતિમ સંસ્કાર કરવાનો ઇનકાર કર્યો હતો. પીડિત પરિવારનું કહેવું છે કે તેમને પ્રશાસનની કાર્યવાહી પર વિશ્વાસ નથી જ્યાં સુધી અંકિતાનો સંપૂર્ણ પોસ્ટમોર્ટમ રિપોર્ટ નહીં આવે ત્યાં સુધી દીકરીના મૃતદેહના અંતિમ સંસ્કાર કરવામાં આવશે નહીં.


અંકિતાના પિતા વિરેન્દ્ર ભંડારીએ સરકાર પાસેથી કેટલાક સવાલોના જવાબ માંગ્યા છે. તેમણે પૂછ્યું કે જ્યારે તમામ પુરાવા હતા ત્યારે સરકારે રિસોર્ટને કેમ તોડી પાડ્યું. અંકિતા હત્યા કેસને ફાસ્ટટ્રેક કોર્ટમાં ચલાવવામાં આવે તેવી માંગણી પણ કરવામાં આવી છે જેથી આરોપીઓને વહેલી તકે ફાંસી આપવામાં આવે. મૃતકના મામા એમ.એસ.રાણાએ કહ્યું કે જ્યાં સુધી પોસ્ટમોર્ટમ રિપોર્ટ જાહેર નહીં થાય ત્યાં સુધી અમે અંતિમ સંસ્કાર કરીશું નહીં. જો કે, અમે અંતિમ સંસ્કાર કરવાનો ઇનકાર કરતા નથી.

વંતરા રિસોર્ટમાં રિસેપ્શનિસ્ટ તરીકે કામ કરતી અંકિતા ભંડારી 18 સપ્ટેમ્બરે ચિલ્લા બેરેજ વિસ્તારમાંથી ગુમ થઈ ગઈ હતી. તે ગુમ થયાના લગભગ એક અઠવાડિયા પછી શનિવારે (24 સપ્ટેમ્બર) ઋષિકેશની એક નહેરમાંથી તેનો મૃતદેહ મળી આવ્યો હતો. આ પછી મૃતદેહને પોસ્ટમોર્ટમ માટે એઈમ્સ ઋષિકેશ લઈ જવામાં આવ્યો. શનિવારે પણ ઋષિકેશના ઓલ ઈન્ડિયા ઈન્સ્ટિટ્યૂટ ઓફ મેડિકલ સાયન્સ (AIIMS)ની બહાર મોટી સંખ્યામાં લોકો એકઠા થયા હતા. આ લોકો 19 વર્ષની અંકિતા ભંડારીની હત્યાના વિરોધમાં એકઠા થયા હતા.

લોકોએ આરોપીઓને ફાંસીની સજાની માંગ કરી હતી. એવો પણ આક્ષેપ કર્યો હતો કે રાજ્યની સત્તાધારી ભાજપ સરકાર કેસોને ઢાંકવાનો પ્રયાસ કરી રહી છે કારણ કે મુખ્ય આરોપી અને રિસોર્ટના માલિક પુલકિત આર્ય ભાજપના નેતા વિનોદ આર્યનો પુત્ર છે. મુખ્યમંત્રી પુષ્કર સિંહ ધામીના આદેશ પર શુક્રવારે વંતારા રિસોર્ટના કેટલાક ભાગોને તોડી પાડવામાં આવ્યા હતા. બીજી તરફ ભાજપ સરકારે આરોપી પુલકિત આર્યના પિતા વિનોદ આર્ય અને ભાઈ અંકિત આર્યને પોતાની ઈમેજ બચાવવા પાર્ટીના પ્રાથમિક સભ્યપદમાંથી હાંકી કાઢ્યા.

આ સાથે સીએમ ધામીએ અંકિતને ઉત્તરાખંડ અન્ય પછાત વર્ગ આયોગના ઉપાધ્યક્ષ પદેથી પણ હટાવી દીધા છે. પોલીસે વંતારા રિસોર્ટના માલિક પુલકિત આર્ય, મેનેજર સૌરવ ભાસ્કર અને તેના સહાયક અંકિત ગુપ્તાને પહેલેથી જ કસ્ટડીમાં લીધા હતા. હવે કોર્ટે ત્રણેય આરોપીઓને 14 દિવસના જ્યુડિશિયલ રિમાન્ડ પર મોકલી દીધા છે.


Share this Article