Election Punch: દેશમાં ફરી એકવાર ચૂંટણીનો માહોલ ગરમાયો છે. પશ્ચિમ બંગાળ સહિત 5 રાજ્યોમાં વિધાનસભા ચૂંટણીની તૈયારીઓ માટે ચૂંટણી પંચે કમર કસી છે, જેના ભાગરૂપે મુખ્ય ચૂંટણી કમિશનરની ટીમ આજે આસામ પહોંચી રહી છે.
આસામથી પ્રવાસનો પ્રારંભ
મુખ્ય ચૂંટણી કમિશનર જ્ઞાનેશ કુમારના નેતૃત્વમાં ચૂંટણી પંચની ટીમ સોમવારે ગુવાહાટી પહોંચશે. આ ટીમ 18 ફેબ્રુઆરી સુધી ત્યાં રોકાશે અને રાજ્યની ચૂંટણી સજ્જતાની સમીક્ષા કરશે. આસામ બાદ પંચની ટીમ પશ્ચિમ બંગાળ, તમિલનાડુ અને અન્ય રાજ્યોનો પણ પ્રવાસ ખેડશે. આ મુલાકાત દરમિયાન વિવિધ રાજકીય પક્ષો, પોલીસ વડાઓ અને જિલ્લા કલેક્ટરો સાથે બેઠકો યોજવામાં આવશે.
માર્ચમાં થઈ શકે છે જાહેરાત
સૂત્રોના જણાવ્યા અનુસાર, 5 રાજ્યોમાં ચૂંટણીની જાહેરાત માર્ચના પ્રથમ સપ્તાહમાં થઈ શકે છે. પશ્ચિમ બંગાળ વિધાનસભાની મુદત 7 મેના રોજ પૂર્ણ થઈ રહી છે, જ્યારે અન્ય રાજ્યો અને પુડુચેરીની મુદત જૂન મહિનામાં પૂરી થાય છે. બિહાર ચૂંટણીના જૂના ટ્રેન્ડને જોતા, પંચ સમય મર્યાદા પૂરી થાય તે પહેલા જ સમગ્ર પ્રક્રિયા પૂર્ણ કરવાનું આયોજન કરી રહ્યું છે.
તૈયારીઓ કેમ મહત્વની છે?
ચૂંટણી પંચનો આ પ્રવાસ કાયદો અને વ્યવસ્થાની સ્થિતિ જાણવા માટે અત્યંત મહત્વનો ગણાઈ રહ્યો છે. ટીમ એ વાતની તપાસ કરશે કે રાજ્યમાં કેટલા સંવેદનશીલ મતદાન મથકો છે અને મતદારોને સુવિધા રહે તે માટે કેટલા નવા બૂથની જરૂર છે. શાંતિપૂર્ણ મતદાન સુનિશ્ચિત કરવા માટે આઈજી અને ડીજીપી સાથે સુરક્ષા વ્યવસ્થા પર પણ ખાસ ચર્ચા કરવામાં આવશે.