ભારતીય રેલવે દેશની સૌથી સુપરફાસ્ટ ટ્રેન વંદે ભારત એક્સપ્રેસને વધુ આધુનિક બનાવવા જઈ રહી છે. વંદે ભારત 4.0 દ્વારા ટ્રેનની ઝડપ, સુરક્ષા અને સુવિધાઓમાં મોટો સુધારો કરવાનો લક્ષ્ય રાખવામાં આવ્યો છે. આ નવી પેઢીની ટ્રેનને અમેરિકા, ચીન અને યુરોપિયન દેશોની ટ્રેનોની સમકક્ષ બનાવવા તૈયારી ચાલી રહી છે.
સ્વદેશી ટેક્નોલોજીથી થશે અપગ્રેડ
વંદે ભારત 4.0 સંપૂર્ણપણે સ્વદેશી ટેક્નોલોજી પર આધારિત રહેશે. ભારતીય રેલવેના આયોજન મુજબ, જૂન 2027 સુધીમાં વંદે ભારત ટ્રેનોને આંતરરાષ્ટ્રીય સ્તરની બનાવવામાં આવશે. ટ્રેનના નિર્માણ દરમિયાન ઝડપ સાથે સુરક્ષા પર ખાસ ધ્યાન આપવામાં આવશે.
ઝડપ વધારવા પર વિશેષ ફોકસ
રેલ મંત્રીના નિર્દેશ પર ટ્રેનની ગતિ વધારવા માટે વિશ્લેષણ શરૂ કરવામાં આવ્યું છે. આ દરમિયાન ટ્રેનની સ્થિરતા, આંતરિક માળખું, સીટ વ્યવસ્થા, શૌચાલય અને મુસાફરોની સુવિધાઓમાં સુધારા કરવાની યોજના છે.
હાલ કેટલી છે વંદે ભારતની સ્પીડ?
હાલ વંદે ભારત ટ્રેનની મહત્તમ ગતિ 180 કિમી પ્રતિ કલાક છે, પરંતુ ટ્રેક અને અન્ય પરિબળોના કારણે સામાન્ય રીતે તે 100થી 130 કિમી પ્રતિ કલાક રહે છે. બજેટ 2026માં આ પ્રોજેક્ટ માટે ખાસ ફંડની શક્યતા વ્યક્ત કરવામાં આવી છે.
130 Kmph vs 160Kmph Vande Bharat Speed Comparison#VandeBharatTrain #IndianRailways pic.twitter.com/gyok6fbnMj
— Trains of India 🇮🇳 (@trainwalebhaiya) September 14, 2024
નિકાસ વધારવાની તૈયારી
આ ઉપરાંત વંદે ભારત 4.0માં કવચ 5.0 સુરક્ષા સિસ્ટમ સામેલ કરવાની યોજના છે. આ ટ્રેનો વિદેશી માંગને ધ્યાનમાં રાખીને પણ તૈયાર કરવામાં આવશે. અમેરિકા, બ્રિટેન, યુરોપિયન યુનિયન અને ચીન જેવા દેશોને ટક્કર આપવા માટે આ નવી પેઢીની ટ્રેન મહત્વપૂર્ણ સાબિત થઈ શકે છે.