Virat Kohli: હવે વિરાટ કોહલીને માત્ર ‘રન મશીન’ કહેવું કદાચ ઓછું પડશે, કારણ કે હવે તેઓ ‘રેકોર્ડ બ્રેકિંગ મશીન’ બની ગયા છે! વિજય હઝારે ટ્રોફીમાં ગુજરાત સામે રમાયેલી મેચમાં વિરાટે માત્ર 77 રનની ઇનિંગ નથી રમી, પણ વિશ્વ ક્રિકેટમાં પોતાનું નામ સુવર્ણ અક્ષરે ફરી એકવાર અંકિત કરી દીધું છે. લિસ્ટ-એ (List A) ક્રિકેટમાં સૌથી શ્રેષ્ઠ એવરેજ ધરાવવાનો વર્લ્ડ રેકોર્ડ હવે વિરાટ કોહલીના નામે થઈ ગયો છે.
જ્યારે પણ ટીમને જરૂર હોય ત્યારે ખડક બનીને ઊભા રહેવું અને ચોકસાઈ સાથે રન બનાવવા એ વિરાટની ઓળખ છે. ગુજરાતના બોલરો સામે રમાયેલી આ ઇનિંગે સાબિત કરી દીધું છે કે ફોર્મ ગમે તે હોય, ક્લાસ હંમેશા કાયમી હોય છે. આવો જોઈએ વિરાટના આ ઐતિહાસિક વર્લ્ડ રેકોર્ડ પરની વિગતો.
વિરાટ કોહલીનો નવો વર્લ્ડ રેકોર્ડ
વિરાટ કોહલીએ લિસ્ટ-એ (List-A) ક્રિકેટના ઈતિહાસમાં ઓછામાં ઓછા ૫,૦૦૦ રન બનાવનારા બેટ્સમેનોમાં સૌથી શ્રેષ્ઠ એવરેજથી રન બનાવવાનો રેકોર્ડ પોતાના નામે કરી લીધો છે.આ સાથે તેમણે ઓસ્ટ્રેલિયાના દિગ્ગજ ખેલાડી માઇકલ બેવનનો રેકોર્ડ તોડી નાખ્યો છે.
આંકડાકીય સરખામણી
- વિરાટ કોહલી: ૩૩૧ ઇનિંગ્સ, ૫૭.૮૭ ની એવરેજ, ૧૬,૨૦૭ રન.
- માઇકલ બેવન: ૫૭.૮૬ ની એવરેજ, ૧૫,૧૦૩ રન.
માઇકલ બેવનને વનડે ક્રિકેટના ઈતિહાસમાં સૌથી શ્રેષ્ઠ ફિનિશર માનવામાં આવતા હતા. ગુજરાત સામે વિરાટે ૬૧ બોલમાં ૭૭ રન બનાવ્યા હતા. વિજય હઝારે ટ્રોફીની પ્રથમ મેચમાં વિરાટે ૧૩૧ રનની ઇનિંગ રમી હતી, જે તેના લિસ્ટ-એ કરિયરની ૫૮મી સદી હતી.
૩૭ વર્ષની ઉંમરે પણ વિરાટનું બેટ અટકવાનું નામ નથી લેતું
૩૭ વર્ષની ઉંમરે પણ વિરાટ કોહલીનું ફોર્મ લાજવાબ છે. છેલ્લી ૬ લિસ્ટ-એ મેચોમાં વિરાટે ૧૪૬ ની અવિશ્વસનીય એવરેજ થી ૫૮૪ રન બનાવ્યા છે. જેમાં તેના બેટમાંથી ૩ સદી અને ૩ અડધી સદી નીકળી છે.
વિરાટ માટે ૨૦૨૫ નું વર્ષ શાનદાર રહ્યું
વિરાટ કોહલી હવે માત્ર વનડે (ODI) મેચો રમે છે. ૫૦-ઓવરના ફોર્મેટની વાત કરીએ તો, વિરાટ આ વર્ષે સૌથી વધુ ODI રન બનાવનાર બેટ્સમેન રહ્યો છે. તેણે આ વર્ષે ૧૩ ઇનિંગ્સમાં ૬૫.૧૦ ની શાનદાર એવરેજથી ૬૫૧ રન બનાવ્યા છે. આ વર્ષે વનડેમાં તેના નામે ૩ સદી અને ૪ અડધી સદી છે. સૌથી વધુ રન બનાવનારા ભારતીયોની યાદીમાં બીજા સ્થાને રોહિત શર્મા છે, જેમણે આ વર્ષે વનડેમાં ૬૫૦ રન બનાવ્યા છે.