GoodBye 2025: વર્ષ 2025 ભારતીય રમતગમત માટે મહિલા શક્તિનું વર્ષ રહ્યું છે. હરમનપ્રીત કૌરની કેપ્ટનશિપમાં ભારતીય ટીમે પહેલીવાર વનડે વર્લ્ડ કપ જીતીને ઈતિહાસ રચી દીધો છે. તો બીજી તરફ, માત્ર 19 વર્ષની દિવ્યા દેશમુખે શતરંજની રમત પર પોતાની અદભૂત ચાલથી દુનિયાને ચોંકાવી દીધી છે. મેદાન કોઈ પણ હોય, ભારતીય દીકરીઓએ પોતાની સિદ્ધિઓથી આ વર્ષે વિશ્વભરમાં ભારતનું નામ રોશન કર્યું છે. તો આવો એક નજર નાખીએ 2025 માં રમતગમત ક્ષેત્રે વર્ષ કેવું રહ્યું..
નારી શક્તિનો રહ્યો દબદબો
વર્ષ 2025માં ભારતીય મહિલા ખેલાડીઓએ રમતગમતના દરેક ક્ષેત્રમાં અસાધારણ સફળતા મેળવી છે. ક્રિકેટના મેદાન પર હરમનપ્રીત કૌરની આગેવાનીમાં ભારતે દક્ષિણ આફ્રિકાને હરાવીને પ્રથમવાર વનડે વર્લ્ડ કપ જીતી ઈતિહાસ રચ્યો છે. શતરંજની બિસાત પર 19 વર્ષની દિવ્યા દેશમુખે વિશ્વ કપ જીતીને ભારતનું નામ રોશન કર્યું છે. આ સિવાય બોક્સિંગ રિંગમાં મીનાક્ષી હુડા અને જેસ્મિન લેમ્બોરિયા જેવી ખેલાડીઓએ ગોલ્ડ મેડલ જીતીને પોતાની તાકાત બતાવી છે.
વર્ષ 2025ની આ અદભૂત સફળતા બાદ હવે 2026માં પણ નારી શક્તિનો દબદબો જોવા મળશે. આગામી વર્ષે કોમનવેલ્થ ગેમ્સ, એશિયન ગેમ્સ અને મહિલા T20 વર્લ્ડ કપ જેવી મોટી ટુર્નામેન્ટ યોજાવાની છે. 2025માં ભારતીય દીકરીઓએ જે પાયો નાખ્યો છે, તેને 2026માં નવા શિખરો પર લઈ જવાની આશા છે. રમત કોઈ પણ હોય, હવે ભારતીય મહિલાઓને રોકવી મુશ્કેલ છે.
હરમનપ્રીતની સેના બની વિશ્વ વિજેતા
હરમનપ્રીત કૌરની કેપ્ટનશિપમાં ભારતીય મહિલા ટીમે દક્ષિણ આફ્રિકાને હરાવીને પ્રથમ વખત વનડે વર્લ્ડ કપ જીત્યો છે. વર્ષ 2005 અને 2017માં ભારત ફાઈનલમાં હારી ગયું હતું, પરંતુ આ વખતે દીકરીઓએ જીતનો દુષ્કાળ ખતમ કરીને ઇતિહાસ રચ્યો છે. આવી જ સફળતા દીપિકા ટીસીની બ્લાઈન્ડ મહિલા ક્રિકેટ ટીમે પણ મેળવી છે, જેણે શ્રીલંકાને હરાવીને દ્રષ્ટિબાધિત વર્લ્ડ કપ પોતાના નામે કર્યો છે.
19 વર્ષની દિવ્યા દેશમુખે દુનિયાને ગજવી
એ જ રીતે શતરંજની રમત ધૈર્ય અને બુદ્ધિની કસોટી કરે છે. માત્ર 19 વર્ષની ઉંમરે દિવ્યા દેશમુખે આ રમત પર પ્રભુત્વ જમાવી વર્લ્ડ કપ જીત્યો છે. આ પ્રતિષ્ઠિત ખિતાબ જીતનાર તે ભારતની પ્રથમ મહિલા ચેમ્પિયન બની છે. દિવ્યાની આ સફળતાએ સાબિત કર્યું કે રમત ગમે તેટલી જટિલ હોય, ભારતીય દીકરીઓ હંમેશા અવ્વલ છે.
તીરંદાજી: હિંમતનું બીજું નામ ‘શીતલ દેવી’
આ ઉપરાંત પેરા આર્ચરીમાં 18 વર્ષની શીતલ દેવીએ આખી દુનિયાને આશ્ચર્યચકિત કરી દીધી છે. હાથ ન હોવા છતાં, તેમણે પોતાના પગથી એવું સચોટ નિશાન લગાવ્યું કે તેઓ પેરા વર્લ્ડ ચેમ્પિયન બની ગયા. શીતલ દેવી આ ખિતાબ જીતનાર ભારતની પ્રથમ તીરંદાજ છે, જે કરોડો લોકો માટે પ્રેરણા બની છે.