મૌલિક દોશી, અમરેલી: અત્યારે ગુજરાતભરમાં ગરમીનું મોજું ફરી વળ્યું છે. આગામી 5 દિવસમાં હીટ વેવ અને યલ્લો એલર્ટની એક બાજુ આગાહી કરવામાં આવી છે. ત્યારે અમરેલી નજીકના કેટલાક વિસ્તારમાં વાતાવરણમાં પલટો જોવા મળ્યો છે. અમરેલી જિલ્લાના સારકુંડલા વિસ્તારમાં કમોસમી વરસાદ કાળઝાલ ગરમી વચ્ચે જોવા મળ્યો છે. કેટલાક ગામોમાં નળીયા અને છાપરા ઉડવા સહીતની ઘટનાઓ અમરેલી વિસ્તારમાં સામે આવી હતી.
આદસંગ, થોરડી, ઘનશ્યામનગર જેવા ગામોમાં ભારે પવન સાથે વરસાદ થયો હતો. ભારે પવન સાથે રાજુલા વિસ્તારના કેટલાક ગામોની અંદર પણ કમોસમી વરસાદી માહોલ જોવા મળ્યો હતો. કમોસમી વરસાદના કારણે અને ભારે પવનના કારણે પારાવાર રીતે કેરીના પાકને નુકશાન થશે. રાજુલા વિસ્તારમાં ખાંભા તાલુકાના ભાણીયા, નાનુડી, પીપળવા ગામ સહીતના વિસ્તારોમાં ભારે વરસાદ પડી રહ્યો છે.
ખેડૂતો પર વધુ એક માર કમોસમી વરસાદના કારણે પડ્યો છે. કેમ કે, ગ્લોબલ વોર્મિંગના કારણે હવામાન બદલાતા ખેડૂતોને પાક લેવો પણ મુશ્કેલ સાબિત થઈ રહ્યો છે. પહેલા વીજળીની મુશ્કેલી, પાણી મળ્યા બાદ કમોસમી વરસાદ એમ બેઉ બાજુ માર પડ્યો છે. આ પ્રકારનો વાતાવરણમાં પલટો એક અઠવાડીયા પહેલા જ થયો હતો ત્યારે ફરીથી માવઠાએ ખેડૂતોની મજા પણ બગાડી છે.