Bank of Maharashtra Profit : જાહેર ક્ષેત્રની બેંકો (PSBs) દ્વારા સતત નફાનો રેકોર્ડ બનાવવામાં આવી રહ્યો છે. ચાલુ નાણાકીય વર્ષ 2023-24ના પ્રથમ ત્રિમાસિક ગાળામાં જાહેર ક્ષેત્રની બેંકોએ (Banks) વાર્ષિક ધોરણે રેકોર્ડ નફો મેળવ્યો છે. જાહેર ક્ષેત્રની બેંકોએ રૂ. 34,774 કરોડનો નફો બમણો કરતાં વધુ નોંધાવ્યો છે. આ બેંકો દ્વારા જાહેર કરવામાં આવેલા પ્રથમ ત્રિમાસિક ગાળાના ડેટા અનુસાર, ગયા નાણાકીય વર્ષના એપ્રિલ-જૂન સમયગાળા દરમિયાન, 12 PSU બેંકોએ કુલ રૂ. 15,306 કરોડનો નફો કર્યો હતો.
NIM 3 ટકાથી ઉપર રહ્યો
આ સમયગાળા દરમિયાન ઊંચા વ્યાજદરને કારણે બેન્કોને વધુ સારું ચોખ્ખું વ્યાજ માર્જિન (Interest Margin) (એનઆઇએમ) મેળવવામાં મદદ મળી હતી. મોટાભાગની બેંકોની NIM 3 ટકાથી વધુ હતી. પ્રથમ ક્વાર્ટરમાં પુણે સ્થિત બેન્ક ઑફ મહારાષ્ટ્રનો (Bank of Maharashtra) એનઆઈએમ સૌથી વધુ 3.86 ટકા રહ્યો હતો. આ પછી, સેન્ટ્રલ બેંકનો એનઆઈએમ 3.62 ટકા અને ઈન્ડિયન બેંકનો 3.61 ટકા હતો. સમીક્ષા હેઠળના સમયગાળા દરમિયાન ચાર ધિરાણકારોએ ૧૦૦ ટકાથી વધુનો નફો કર્યો હતો.
પીએનબીમાં સૌથી વધુ વૃદ્ધિ નોંધાઈ
પંજાબ નેશનલ બેન્ક (પીએનબી)એ સૌથી વધુ રૂ.1,255 કરોડની વૃદ્ધિ નોંધાવી હતી, જે ગયા નાણાકીય વર્ષના સમાન ત્રિમાસિક ગાળામાં રૂ.308 કરોડ હતી. એસબીઆઈનો નફો અત્યાર સુધીના કોઈપણ ક્વાર્ટરની તુલનામાં સૌથી વધુ હતો. તેણે ચોખ્ખો નફો 178 ટકા વધીને રૂ.16,884 કરોડ નોંધાવ્યો હતો, જે તમામ સરકારી બેંકો દ્વારા કમાયેલા કુલ નફાના લગભગ 50 ટકા જેટલો છે.
અન્ય પાંચ પીએસબીમાં ૫૦ ટકાથી ૧૦૦ ટકાની વચ્ચે વૃદ્ધિ નોંધાઈ છે. બેન્ક ઓફ મહારાષ્ટ્ર 95 ટકાના વધારા સાથે 882 કરોડ રૂપિયાના ચોખ્ખા નફા સાથે આ યાદીમાં ટોચ પર છે. આ પછી બેન્ક ઓફ બરોડાનો ચોખ્ખો નફો 88 ટકા વધીને રૂ.4,070 કરોડ થયો હતો. યુકો બેન્કનો નફો ૮૧ ટકા વધીને રૂ.૫૮૧ કરોડ થયો હતો. 12 બેન્કોમાંથી માત્ર દિલ્હી સ્થિત પંજાબ અને સિંધ બેન્કે ચોખ્ખા નફામાં ઘટાડો નોંધાવ્યો હતો.