Cricket News: ભારતીય ટીમના યુવા ઓપનર યશસ્વી જયસ્વાલે વિશાખાપટ્ટનમમાં ઇંગ્લેન્ડ સામે યાદગાર ઇનિંગ રમી હતી. કેપ્ટન રોહિત શર્મા 5 મેચની શ્રેણીની બીજી ટેસ્ટમાં રન બનાવવામાં નિષ્ફળ રહ્યો હતો અને ત્યારબાદ શુભમન ગીલે પણ સારી શરૂઆત બાદ પોતાની વિકેટ ગુમાવી દીધી હતી. શરૂઆતના બે આંચકાઓ પછી પણ યશસ્વીએ રનની ગતિ વધારી અને એક છેડે સદી ફટકારી.
વિશાખાપટ્ટનમમાં ઈંગ્લેન્ડ સામે રમાઈ રહેલી શ્રેણીની બીજી મેચમાં ભારતીય ટીમના કેપ્ટન રોહિત શર્માએ ટોસ જીતીને પ્રથમ બેટિંગ કરવાનું પસંદ કર્યું હતું. ડેબ્યૂ કરી રહેલા શોએબ બશીરે ટીમ ઈન્ડિયાને મોટો ઝટકો આપ્યો અને હિટમેનની વિકેટ મેળવી. પોતાના ટેસ્ટ કરિયરની પહેલી વિકેટ લઈને આ યુવા સ્પિનરે ટીમ ઈન્ડિયાને પહેલો ઝટકો આપ્યો હતો. બીજી વિકેટ શુભમન ગિલના રૂપમાં પડી. બે વિકેટ પડી ગયા પછી પણ યશસ્વી જયસ્વાલે એક છેડો સંભાળી લીધો અને શ્રેયસ અય્યર સાથે દાવને આગળ ધપાવ્યો.
યશસ્વીએ સદી ફટકારી હતી
ઇંગ્લિશ બોલરોનો જોરદાર સામનો કરતા યશસ્વી જયસ્વાલે 89 બોલનો સામનો કર્યો અને 6 ચોગ્ગા અને 1 છગ્ગાની મદદથી પોતાની ફિફ્ટી પૂરી કરી. આ પછી તેણે બેટિંગને આગળ વધારી અને છેલ્લી મેચમાં સદી પૂરી ન કરી શકવાના અફસોસનો અંત લાવ્યો. 151 બોલમાં 11 ચોગ્ગા અને 3 છગ્ગાની મદદથી ટેસ્ટમાં પોતાની બીજી સદી ફટકારી હતી.
ડેબ્યૂમાં 171 રનની ઇનિંગ રમી હતી
યશસ્વી જયસ્વાલે પોતાના ટેસ્ટ ડેબ્યૂમાં ધમાકેદાર પ્રદર્શન કર્યું હતું અને તેણે 171 રનની ઇનિંગ રમી હતી. તેણે જુલાઈ 2023માં વેસ્ટ ઈન્ડિઝ સામે ટેસ્ટ ક્રિકેટમાં ડેબ્યૂ કર્યું હતું. વિદેશ પ્રવાસ પર તેની કારકિર્દીની પહેલી જ મેચમાં તેણે 387 બોલમાં 16 ચોગ્ગા અને 1 છગ્ગાની મદદથી 171 રન બનાવ્યા હતા.