વર્ષ ૧૯૮૨માં મિથુન ચક્રવર્તીની ‘ડિસ્કો ડાન્સર’ નામની સુપરહિટ ફિલ્મ આવી હતી. આ ફિલ્મનું બપ્પીદાનું આઈકોનિક ગીત ‘જિમ્મી જિમ્મી આજા આજા’ આજે પણ પ્રખ્યાત છે. તમને જાણીને નવાઈ લાગશે કે, આ ગીતે ૨૦૦૮માં રીલિઝ થયેલી હોલીવુડ ફિલ્મ ‘યુ ડોન્ટ મેસ વિથ ધ જાેહાન’માં એક ખાસ જગ્યા બનાવી હતી. હોલીવુડ કોમેડીના અંતમાં એક સાઉન્ડટ્રેક આવે છે જેમાં ‘જિમ્મી જિમ્મી’ મ્યુઝિકને જૂલિયસ ડોબોસે ખૂબ જ શાનદાર રીતે રી-અરેન્જ કરેલું છે.
બપ્પીદાએ ૧૯ વર્ષની ઉંમરે એક સંગીત નિર્દેશક તરીકે પોતાની કરિયરની શરૂઆત કરી હતી. બંગાળી ફિલ્મ દાદૂ (૧૯૭૨)માં તેમને પ્રથમ વખત ગીત ગાવાનો અવસર મળ્યો હતો અને તેમણે નન્હા શિકારી (૧૯૭૩) દ્વારા હિંદી ફિલ્મોમાં જગ્યા બનાવવાનું શરૂ કર્યું હતું. તાહિર હુસૈનની હિંદી ફિલ્મ જખ્મી (૧૯૭૫) દ્વારા તેમણે બોલીવુડમાં પોતાની જાતને સ્થાપિત કરી હતી અને એક પાર્શ્વ ગાયક તરીકે ઓળખ ઉભી કરી હતી. દેશમાં ૮૦-૯૦ના દશકામાં ડિસ્કો મ્યુઝિકને નવી ઓળખ અપાવવામાં બપ્પીદાની મહત્વની ભૂમિકા રહી છે.
સંગીત ઈન્ડસ્ટ્રીમાં ડિસ્કોકિંગ કહેવાતા બોલિવુડના સંગીત-નિર્દેશક બપ્પી લહેરીએ મંગળવારે મુંબઈની એક હોસ્પિટલમાં અંતિમ શ્વાસ લીધા હતા. તેમનું સાચું નામ આલોકેશ લાહિડી હતું અને તેઓ સંગીતની સાથે પોતાના ગોલ્ડ પ્રેમને લઈને પણ જાણીતા હતા. ઉલ્લેખનીય છે કે, ભારતમાં પોપ સંગીત લાવવાનું શ્રેય પણ બપ્પીદાને જ અપાય છે. કિશોર કુમાર અને ‘કિશોર દા’ના હુલામણા નામે જાણીતા સદીના મહાન ગાયક આભાસકુમાર ગાંગુલી અને બપ્પીદા વચ્ચે બ્લડ રિલેશન હતું એ વાતથી ઘણાં લોકો અજાણ છે. કિશોર કુમાર બપ્પીદાના માતૃપક્ષે સગા થતા હતા.
પશ્ચિમ બંગાળના જલ્પૈગુરી ખાતે અપરેશ લહેરી અને બંસુરી લહેરીના ઘરે બપ્પીદાનો જન્મ થયો હતો. બપ્પીદાના માતા-પિતા પ્રખ્યાત બંગાળી ગાયકો હતા અને ક્લાસિકલ મ્યુઝિકમાં તેમના પ્રદાનને લઈ જાણીતા હતા. મહાન ગાયક કિશોર કુમાર કોલકાતાના બંગાળી બ્રાહ્મણ પરિવારમાં જન્મેલા બપ્પીદાના મામા થતા હતા. બપ્પી લહેરી અને કિશોર કુમારે તેમની કારકિર્દી દરમિયાન અનેક વખત કોલાબ્રેટ કર્યું હતું.
૧૯૮૨માં રીલિઝ થયેલી ક્લાસિક મૂવી નમક હલાલનું પગ ઘૂંઘરૂ બાંધ એ બપ્પીદાનું કિશોર કુમાર સાથેનું સૌથી વધુ યાદગાર ગીત છે. તે સિવાય શરાબીનું મંઝિલે અપની જગહ હૈ, ચલતે ચલતે ફિલ્મનું ચલતે ચલતે મેરે યે ગીત યાદ રખના અને મોહબ્બત ફિલ્મનું સાંસો સે નહીં કદમોસે નહીંમાં તેમણે સાથે કામ કર્યું હતું.