ગાંધીનગરના સરગાસણની પ્રાથમિક શાળામાં શિક્ષક તરીકે નોકરી કરતી ૩૭ વર્ષીય મહિલાએ ઈન્ફોસિટી પોલીસ સમક્ષ પૂર્વ પતિ વિરુદ્ધ ફરિયાદ નોંધાવી હતી. ફરિયાદમાં મહિલાએ પૂર્વ પતિ સામે છેડતી તેમજ શારીરિક શોષણનો આરોપ લગાવ્યો હતો. બનાસકાંઠાના પાલનપુરની વતની મહિલાએ તેની ફરિયાદમાં જણાવ્યું હતું કે, તે છેલ્લા ત્રણ વર્ષથી પ્રાથમિક સ્કૂલમાં શિક્ષક તરીકેની નોકરી કરી રહી છે. તેણે તેના પૂર્વ પતિના શોષણથી પરેશાન થઈને પોતાનું વતન છોડી દીધું હતું, જે ગાંધીનગરના સેક્ટર ૧૩નો રહેવાસી છે.
મહિલાએ જણાવ્યું હતું કે, તેણે વર્ષ ૨૦૦૨માં પરિવારની ઈચ્છાને માન આપીને તેની સાથે લગ્ન કર્યા હતા. તેમને નવ વર્ષની એક દીકરી પણ છે. આશરે ૧૪ વર્ષ સુધી લગ્નજીવનમાં રહ્યા બાદ, તેઓ અલગ થયા હતા અને ૨ મે, ૨૦૧૬ના રોજ ડિવોર્સ લીધા હતા. જાે કે, ડિવોર્સના તરત બાદ જ તેણે કથિત રીતે તેને હેરાન કરવાનું શરૂ કરી દીધું હતું અને તેને છોડી દેવાનો મુદ્દો ઉછાળ્યો હતો. આ વાતથી કંટાળીને, મહિલાએ પાલનપુર મહિલા પોલીસનો સંપર્ક કર્યો હતો પરંતુ બાદમાં તેણે તેને માફ કરવાનું પસંદ કર્યું હતું. બાદમાં તે તેની દીકરી સાથે ગાંધીનગરમાં રહેવા લાગી હતી.
જ્યારે મહિલાના પૂર્વ પતિને જાણ થઈ કે, તે ગાંધીનગરમાં શિફ્ટ થઈ છે તો તે પણ ત્યાં રહેવા જતો રહ્યો હતો અને ફરીથી તેને પરેશાન કરવાનું શરૂ કર્યું હતું. જાે મહિલાએ પૂર્વ પતિ પાસે જવાનો ઈનકાર કર્યો તો તેને બદનામ કરવાની કથિત ધમકી પણ આપી હતી. તે તેને ફોન પર અશ્લીલ મેસેજ પણ મોકલતો હતો. પોલીસે મહિલાના પૂર્વ પતિ સામે છેડતી તેમજ ગુનાહિત ધમકીનો ગુનો નોંધ્યો હતો.