વડોદરા શહેરમાં રહેતી એક યુવતીએ હોંશે હોંશે ડૉક્ટર સાથે લગ્ન કર્યા, પણ ત્રણ જ મહિનામાં તેનું જીવતર ઝેર બની ગયુ હતુ. પોતાનું દાંપત્યજીવન માત્ર ત્રણ જ મહિનામાં પડી ભાગ્યુ હતુ. એટલું જ નહીં જ્યારે લગ્નની પહેલી રાત્રી હતી ત્યારે ડૉક્ટર પતિ નહીં પણ તેની નણંદના બાળકો રુમમાં સૂવા માટે આવ્યા હતા. એટલું જ નહીં પરિણિતાનો આક્ષેપ છે કે, તેના પતિએ સંબંધ રાખવા માટે વધુ દહેજની માગ કરી હતી.
ત્યારે દહેજ ભૂખ્યા પતિ અને સાસરીયઓ વિરુદ્ધ પરિણિતાએ મહિલા પોલીસ સ્ટેશનમાં ફરિયાદ કરી હતી. પોલીસે પણ આ મામલે ગુનો નોંધીને આગળની કાર્યવાહી હાથ ધરી હતી. પરિણિતા મહિલા પોલીસ સ્ટેશનમાં ફરિયાદ કરીને એવા આક્ષેપો કર્યા છે કે, તેના લગ્ન એક ડૉક્ટર સાથે થયા હતા. આ ડૉક્ટર બીજા રાજ્યનો વતની છે અને તેનું નામ વીરજુ છે. જ્યારે લગ્ન થયા ત્યારે યુવતીના પિતાએ લગ્નનમાં કોઈ પણ જાતકની કચાશ રાખી નહોતી.
એટલું જ નહીં યુવતીના પિતાએ દહેજમાં ઈલેક્ટ્રિક સાધનો, રોકડા બે લાખ અને દાગીના આપ્યા હતા અને એના માટે ૧૦ લાખ રુપિયાની લોન લીધી હતી. લગ્ન બાદ યુવતી પતિ સાથે બીજા રાજ્યમાં રહેવા માટે ગઈ હતી. ત્યારે લગ્નની પહેલી રાત્રે જ તેને ભયંકર અનુભવ થયો હતો. યુવતી લગ્નની પહેલી રાત્રે પોતાના પતિની રાહ જાેઈને બેસી હતી.
ત્યારે ડૉક્ટર પતિના બદલે તેની નણંદના બાળકો રુમમાં સૂવા માટે આવી ગયા હતા. પહેલા દિવસે યુવતીએ આ વાતને સરળતાથી લીધી હતી. બાદમાં બે પાંચ દિવસ સુધી રોજ રાત્રે આવું જ ચાલ્યા કરતુ હતુ. જેથી યુવતીએ તેના પતિ, સાસુ અને નણંદને વાત કરી હતી. ત્યારે પતિએ પોતાની બહેન અને માતાનું ઉપરાણુ લઈ કહ્યું હતું કે, એમની મરજી મુજબ જ રહેવું પડશે. સાથે જ તારા પિતાએ દહેજ પણ ઓછુ આપ્યું છે.
જાે હજુ પણ વધુ દહેજ આપે તો જ તારી સાથે સંબંધ રાખીશ. પતિની આ વાત સાંભળીને પરિણિતાના પગ નીચેથી જમીન સરકી ગઈ હતી. તેના પિતાએ લગ્નમાં દહેજ આપ્યુ હોવા છતા સાસરીયાઓને જરાય સંતોષ નહોતો. જાે કે, પરિણિતાએ આ વાતનો ઈનકાર કર્યો હતો. જેથી સાસરીયાઓનો ત્રાસ વધી ગયો હતો. આખરે પરિણિતાએ આ વાતની જાણ પિતાને કરી હતી.
ત્યારે પિતાએ રુપિયા ૩૦ હજાર ટ્રાન્સફર કર્યા હતા. તેમ છતા દહેજ ભૂખ્યા સાસરીયાઓ ધરાતા નહોતા. કોઈને કોઈ બહાને તેને ત્રાસ આપતા અને મારઝૂડ કરતા હતા. બાદમાં યુવતીના પિતા તેને લઈ ગયા હતા. આખરે પરિણિતાએ મહિલા પોલીસ સ્ટેશનમાં પોતાના પતિ, સાસુ-સસરા અને નણંદ વિરુદ્ધ ફરિયાદ નોંધાવી હતી.