અમદાવાદ શહેરના સોલા પોલીસ સ્ટેશનમાં જમ્મુ-કાશ્મીરના યુવક વિરુદ્ધ તેલંગાણાની યુવતીએ ફરિયાદ નોંધાવી છે. યુવતીનો આક્ષેપ છે કે, આ યુવકે તેને લગ્નની લાલચ આપીને દુષ્કર્મ આચર્યું હતું. અગાઉ પણ યુવતી ગર્ભવતી બની હતી ત્યારે એબોર્શન કરાવ્યું હતું. જ્યારે યુવતી બીજી વાર ગર્ભવતી બનતા તેણે બાળક રાખવાની ઈચ્છા વ્યક્ત કરી હતી. તે કાશ્મીરના યુવક સાથે લિવઈનમાં રહેતી પણ હતી તેણે દગો આપ્યો હતો. તે ગર્ભવતી બન્યા બાદ દોઢ મહિના પહેલાં યુવક ફરાર થઈ ગયો હતો. યુવકે તેને લગ્નનું વચન આપીને ગર્ભવતી બનાવી હતી અને ફરાર થઈ જઈ તેની સાથે છેતરપિંડી આચરી છે. ત્યારે સોલા પોલીસે પણ આરોપી વિરુદ્ધ ગુનો નોંધીને આગળની કાર્યવાહી હાથ ધરી છે.
યુવતીએ સોલા પોલીસ સ્ટેશનમાં કરેલી ફરિયાદમાં એવા આક્ષેપો કર્યા છે કે, ૨૦૧૮માં તે જયપુરમાં એગ્રીકલ્ચરનો અભ્યાસ કરતી હતી. તે સમયે કાશ્મીરનો યુવક ફાર્મસી કરતો હતો. આ દરમિયાન તેઓનો પરિચય થયો હતો અને બાદમાં પ્રેમસંબંધ બંધાયો હતો. તે યુવક એજાઝ અબ્દુલ રહેમાન નાઈક સાથે લિવઈનમં રહેતી હતી. બંને વચ્ચે પ્રેમસંબંધ બાદ તે ગર્ભવતી બની હતી. પરંતુ યુવકે બાળક રાખવાનો ઈનકાર કર્યો હતો. જેથી યુવતીએ એબોર્શન કરાવ્યું હતું. અભ્યાસ પૂરો કર્યા બાદ તેઓ અમદાવાદના સોલા વિસ્તારમાં આવેલા કારગીલ પેટ્રોલ પંપ પાસે આવેલી એક કંપનીમાં નોકરીએ લાગ્યા હતા.
એટલે બંનેએ સાથે રહેવાનો ર્નિણય કર્યો હતો. બાદમાં યુવક અને યુવતી ચાણક્યપુરી વિસ્તારમાં આવેલા એક એપાર્ટમેન્ટમાં સાથે રહેવા લાગ્યા હતા. યુવક અને યુવતીએ પાડોશીઓને એવું જણાવ્યું હતું કે તેઓએ લગ્ન કર્યા છે. આ દરમિયાન યુવતી ફરીથી ગર્ભવતી બની હતી. જેથી તેણે આ વાતની જાણ પોતાના પાર્ટનરને કરી હતી.
ત્યારે યુવતીએ બાળક રાખવાની ઈચ્છા પણ વ્યક્ત કરી હતી. જાે કે, યુવકે બાળક રાખવાનો ઈનકાર કરી એબોર્શનની વાત કરી હતી. યુવતી એબોર્શન કરાવવા માટે તૈયાર ન થતા બંને વચ્ચે તકરાર થઈ હતી. આ દરમિયાન ગઈ ૨૯ મેના રોજ યુવક યુવતીને છોડીને ત્યાંથી ફરાર થઈ ગયો હતો. યુવતીને લગ્નની લાલચ આપી તેને ગર્ભવતી બનાવીને અચાનક યુવક ગાયબ થઈ જતા યુવતી ચિંતિત બની હતી. આખરે યુવતી આ વાતની ફરિયાદ સોલા પોલીસ સ્ટેશનમાં કરી હતી. યુવતીની ફરિયાદના આધારે પોલીસે આરોપી યુવક વિરુદ્ધ ગુનો નોંધીને આગળની કાર્યવાહી હાથ ધરી છે.