એપ પરથી લોન અપ્લાય કરો અને તાત્કાલિક રૂપિયા મેળવો અને તે પછી લોન રિકવરી એજન્ટ દ્વારા ન્યૂડ ફોટો વાયરલ કરવા સહિતની ધમકી આપવામાં આવતી હતી. આવો જ એક કિસ્સો તાજેતરમાં અમદાવાદમાં બન્યો હતો કે જેમાં કાપડના વેપારી દ્વારા એપ પરથી લોન લીધા બાદ તેમને તથા તેમના સગાને પરેશાન કરવામાં આવતા હતા. હવે દિલ્હીમાં આ રેકેટનો પર્દાફાશ થયો છે અને એક ગેગ પકડાઈ છે. આ એપ પાછળ ચાઈનીસ એપનું કનેક્શન સામે આવ્યું છે.
ઈન્ટરનેશનલ સિન્ડિકેટનો ભાંડો ફૂટ્યો છે જેમાં એપ દ્વારા તાત્કાલિક લોનની વાત કરીને ફોન હેક કરી લેવામાં આવતો હતો અને તે પછી પીડિતના એડિટ કરેલા ન્યૂડ ફોટો વાયરલ કરવાની ધમકી આપવામાં આવતી હતી. દિલ્હી સહિત દેશના અન્ય ભાગોમાં તાજેતરમાં આ પ્રકારના ઘણાં કિસ્સા સામે આવ્યા હતા. દેશભરમાં ચાલેલા દરોડામાં એક મહિલા સહિત ૮ લોકોની ધરપકડ કરવામાં આવી છે. આ સિવાય અન્ય દેશોમાં સક્રિય ચીનના સંદિગ્ધોની પણ ઓળખ થઈ છે.
આર્થિક મુશ્કેલીમાં મૂકાયેલા લોકોને લોકોની લાલચ આપ્યા બાદ તેમની પાસેથી પડાવેલા રૂપિયા ચીન, હોંગકોંગ અને દુબઈ મોકલવામાં આવતા હતા. પોલીસને કાર્યવાહી દરમિયાન એક જ અકાઉન્ટમાંથી ૮.૨૫ કરોડ રૂપિયા મળ્યા છે. આ સિવાય ૨૫ અન્ય ખાતાની ઓળખ થઈ છે. આ સિવાય પોલીસને કેશ, નવી એસયુવી, લેપટોપ, ડઝન ડેબિટ કાર્ડ અને પાસબૂક પણ મળી છે.
દિલ્હી પોલીસ કમિશનર રાકેશ અસ્થાનાએ ઈન્ટેલિજન્સ ફ્યુઝન એન્ડ સ્ટ્રેટેજિક ઓપરેશન યુનિટને સિન્ડિકેટના ઓપરેશન પર એક્શન લેવા માટે કહ્યું હતું. આ પછી સ્પેશિયલ સેલના નેતૃત્વમાં એક ટીમ બનાવીને તપાસ શરુ કરવામાં આવી હતી. તપાસ દરમિયાન ટીમોએ દિલ્હી, હરિયાણા અને રાજસ્થાન સહિત દેશના અન્ય રાજ્યોમાંથી સંદિગ્ધની ધરપકડ કરવામાં આવી છે.
અમદાવાદના કાપડના વેપારી સાથે બનેલી કિસ્સામાં તેમણે સાઈબર ક્રાઈમને નોંધાવેલી ફરિયાદ પ્રમાણે તેમની પત્નીના એડિટ કરેલા ન્યૂડ ફોટો તેમને તથા તેમના ફોનમાં જે નંબરો છે તેમને મોકલવામાં આવ્યા હતા. આ જ મોડેસ ઓપરેન્ડી સાથે દિલ્હી સહિત દેશના અન્ય શહેરોમાં લોન આપ્યા બાદ વધારે રૂપિયા પડાવવામાં આવતા હતા. અમદાવાદમાં બનેલી ઘટનામાં કાપડના વેપારીએ મિત્રની સલાહ બાદ એક પછી એક ૧૪ એપ પરથી લોન લીધી હતી. તેમણે ૧.૨૦ લાખની લોન સામે જાન્યુઆરીમાં ૨.૩૬ લાખ રૂપિયા ચૂકવ્યા હતા.
આમ છતાં રિકવરી એજન્ટ દ્વારા તેમની પાસે સતત રૂપિયાની માગણી કરવામાં આવતી હતી. આ કેસમાં અમદાવાદ સાઈબર ક્રાઈમ પોલીસે તપાસ શરુ કરી હતી, જેમાં દિલ્હીવાળું કનેક્શન સામે આવી શકે છે. આ પછી બદમાશોએ ફરિયાદીની પત્નીના ફોટોને એડિટ કરીને ન્યૂડ બનાવ્યા હતા અને તેમને તથા તેમના સગાને મોકલવામાં આવ્યા હતા. પોલીસે સિન્ડિકેટના ભારતના માસ્ટરમાઈન્ડ કૃષ્ણા ઉર્ફે રવિશંકરને જાેધપુરથી પકડી લીધો છે.
પોલીસે રવિશંકાર સાથે કામ કરતી એક ચીની નાગરિકની પણ ધરપકડ કરી લીધી છે. જાેકે, હજુ સુધી તેની ઓળખ જાહેર કરાઈ નથી. કૃષ્ણાએ પોતાના કથિત ચીની સાથીને બેંકના ખાતાની વ્યવસ્થા કરી આપી અને જબરજસ્તી વસૂલેલા રૂપિયાને ક્રિપ્ટોકરન્સી દ્વારા ચીન મોકલી દીધા. ત્રણ ચીનના નાગરિકોના ગુપ્ત ખાતાની ઓળખ થઈ છે. પકડાયેલા લોકોમાં એક કાર્તિક પંચાલ પણ છે, જે પીડિત વ્યક્તિઓનો સંપર્ક કરનારી ટીમને સંભાળતો હતો.
પોલીસ અધિકારીએ જણાવ્યું કે ‘કેશ એડવાન્સ એપને એન્ડ્રોઈડ ડિવાઈસમાં પ્રોક્સી બનાવીને ચીનના સર્વર સાથે કનેક્ટ કરાતું હતું. માલિકે ગૂગલ એપ સ્ટોર પર ડેવલોપર કંપની વિશે જરુરી માહિતી નહોતી આપી. પોલીસ આ પ્રકારની છેતરપિંડીમાં પીડિત બન્યા હોય તેમની શોધખોળ કરી રહી છે. આ સાથે સિન્ડિકેટના અન્ય સભ્યોની પણ તપાસ કરાઈ રહી છે. આવનારા દિવસોમાં વધુ લોકોની ધરપકડ કરાય તેવી સંભાવના છે.
છેતરપિંડી કરતી ગેંગની મોડસ ઓપરંડી નીચે મુજબ છે.
રૂપિયાની સખત જરુર હોય તેવા લોકો આ લોકોના ટાર્ગેટ બનતા હતા.
ફોનમાં એપ ઈન્સ્ટોલ કરતી વખતે જરુરી પરમિશન માગી લેવામાં આવતી હતી.
લોનની ૬૦થી ૭૦% અમાઉન્ટ અરજદારના ખાતામાં ટ્રાન્સફર કરી દેતા હતા.
આ પછી લોનની એપ દ્વારા અરજદારનો ફોન હેક કરીને તેમાંથી ડેટાની ચોરી કરાતી હતી.
લોનની ચૂકવણી માટે સતત બ્લેકમેઈલ કરીને ધમકીઓ આપવાનું શરુ કરાતું હતું.
અગાઉ વાત કરી હોય તેના કરતા વધારે રૂપિયાની માગણીઓ શરુ કરવામાં આવતી હતી.
ગેંગના સભ્યો પીડિત વ્યક્તિ સાથે અસભ્ય વર્તન કરીને સતત દબાણ ઉભું કરતા હતા.
આ પછી પણ પીડિત રૂપિયા ના આપે તો ન્યૂડ ફોટ વાયરલ કરવાની ધમકી અપાતી હતી.
નિશ્ચિત કરેલી રકમ મળી ગયા પછી ત્રાસ આપવાનું બંધ કરી દેવાતું હતું.