(માહિતી બ્યુરો, પાલનપુર): ૧૪-દિયોદર વિધાનસભા મતવિસ્તારમાં નાની ઘરનાળ ગામે કોરોના પોઝિટિવ પેશન્ટ બાબુભાઇ મલાભાઇ દેસાઇએ PPE કીટ પહેરી સાજે-૪.૩૦ કલાકે મતદાન કર્યુ હતું. ગઇ તા.૩૦ નવેમ્બરના રોજ બાબુભાઈને કોરોનાના સામાન્ય લક્ષણો દેખાતા તેમણે RTPCR રિપોર્ટ કરાવ્યો હતો. જે રિપોર્ટ તા. ૨ ડિસેમ્બરના રોજ પોઝિટિવ આવતા તેઓ હોમ આઇસોલેશનમાં વરનોડા પ્રાથમિક આરોગ્ય કેન્દ્રની નિગરાનીમાં સારવાર લઇ રહ્યા છે.
તેઓ કોરોના પોઝિટિવ હોવાથી અન્ય મતદારોની આરોગ્ય સુરક્ષાને ધ્યાનમાં લઇ આજે મતદાનના દિવસે અંતિમ કલાકોમાં તેમણે PPE કીટ પહેરીને પોતાના મતાધિકારનો ઉપયોગ કર્યો હતો. લોકોના આરોગ્યની જાળવણી માટે કોરોના પેશન્ટની સાથે આરોગ્ય કર્મચારીએ પણ PPE કીટ પહેરીને નાગરિકોને સુરક્ષાની પ્રતિતિ કરાવી હતી.
તો વળી 10- દાંતા વિધાનસભા મત વિસ્તારના આદિવાસી મતદાન મથકો પર વહેલી સવારથી જ ભારે મતદાન જોવા મળ્યું હતું. જિલ્લા ચૂંટણી તંત્ર દ્વારા મતદાર જાગૃતિના કાર્યક્રમો થકી આ વિસ્તારમાં મતદાન અંગેની જાગૃતિ જોવા મળી. દાંતા તાલુકાના વશી, પીપળાવાળી વાવ, હરિવાવ, કુવારશી, વસઇ દેવડી જેવા આદિવાસી વિસ્તારમાં મતદાનનો ભારે ઉત્સાહ જોવા મળ્યો. ખાસ કરીને મહિલા મતદારોએ આ બુથો પર મતદાનમાં ખૂબ ઉત્સાહ બતાવી તેમના મતાધિકારનો ઉપયોગ કર્યો.