હાલમાં ગુજરાતમાં વિધાનસભા ચૂંટણીના પડઘમ વાગી રહ્યા છે ત્યારે નેતાઓ પણ પાર્ટી બદલી રહ્યા છે અને એક પાર્ટીમાંથી બીજી પાર્ટીમાં કુદકા મારી રહ્યા છે. હવે એક મોટા સમાચાર સામે આવ્યા છે. ચૂંટણી પહેલા ભારતીય જનતા પાર્ટીમાં મોટું ગાબડુ પડ્યું છે, કારણ કે પંચમહાલના પૂર્વ સાંસદ પ્રભાત સિંહ ચૌહાણ કોંગ્રેસ પાર્ટીમાં જોડાયા છે.
મળતી માહિતી પ્રમાણે આજે ફાગવેલ પરિવર્તન યાત્રામાં પ્રભાતસિંહ ચૌહાણ કોંગ્રેસમાં જોડાયા છે. ભાજપના પૂર્વ સાંસદ પ્રભાતસિંહ ચૌહાણ કોંગ્રેસમાં જોડાયા એ વાતને લઈ રાજકીય ગલીઓમાં પણ હાહાકાર મચી ગયો છે અને આ ઘટનાને પણ મોટી ગણવામાં આવી રહી છે. મહત્વનું છે કે, આજે કોંગ્રેસ મહામંત્રી મોહન પ્રકાશ અને અમિત ચાવડાએ ખેસ પહેરાવી આવકાર્યા હતા.
જો કે એક મોટી વાત એ રીતે ગણી શકાય કે, અત્યાર સુધી કોંગ્રેસ કે આપ માંથી નેતાઓ કે કાર્યકર્તાઓ ભાજપમાં જોડાતા હતા. જોકે આજે ભાજપના કદાવર સાંસદ પ્રભાતસિંહ કોંગ્રેસમાં જોડતા રાજકારણમાં ગરમાવો આવી ગયો છે. આ સાથે NCPનાં વડોદરાનાં નેતા ડોકટર તસવીન સિંહ પણ કોંગ્રેસમાં જોડાયા હતા. મૂછ નહીં તો કુછ નહીં એવું કહીને પ્રભાતસિંહ કોંગ્રેસમાં જોડાયા છે.