રાજ્યમાં છેલ્લાં બે દિવસથી ઠંડીનો ચમકારો ઘટ્યો છે. ત્યારે રાજ્યના વાતાવરણમાં ફરી એકવાર પલટો આવશે એવી હવામાન વિભાગે આગાહી કરી છે. રાજ્યમાં આગામી સમયમાં માવઠું પડવાની અને ભારે પવન ફૂંકાવાની આગાહી કરવામાં આવી છે. જેના પગલે મત્સ્ય વિભાગે માછીમારોને પણ અલર્ટ કરી દીધા છે. ફરીથી સૂચના ન મળે ત્યાં સુધી માછીમારોને ટોકન ઈશ્યૂ ન કરવામાં આવે એવી પણ સૂચના આપવામાં આવી છે. આ સૂચના મત્સ્ય વિભાગે મદદનીશ મત્સ્ય ઉદ્યોગ નિયામકને આપી છે.
જાે ભારે પવન સાથે માવઠું થાય ત્યારે માછીમારોને જાનમાલનું નુકસાન ન થાય એ માટે આ સૂચના આપવામાં આવી છે. આ સિવાય દરિયો ખેડવા ગયેલા માછીમારોને પણ પરત બોલાવવા માટે સૂચના આપી દેવામાં આવી છે. હવામાન વિભાગે કરેલી આગાહી મુજબ, રાજ્યમાં આગામી ૨-૩ ફેબ્રુઆરીના રોજ વાતાવરણમાં પલટો આવશે. રાજ્યમાં ફરી એકવાર ભારે પવન અને કમોસમી વરસાદ પડવાની શક્યતા છે. આ સિવાય આગામી ૪ ફેબ્રુઆરી બાદ ઠંડી પણ અનુભવાશે. દરિયામાં સર્જાયેલી વરસાદી સિસ્ટમના કારણે વાતાવરણમાં ફેરફાર જાેવા મળશે.
મત્સ્ય નિયામક કચેરી દ્વારા એક નોટિફિકેશ પણ બહાર પાડવામાં આવ્યું છે. આ નોટિફિકેશન મુજબ, વેરાવળ, પોરબંદર, જાફરાબાદ, જામનગર, નવસારી, વલસાડ, સુરત, ભાવનગર, રાજકોટ, કચ્છ, માંગરોળ, ઓખા, ભરૂચ, મોરબી નજીક જે દરિયા કિનારા છે ત્યાં માછીમારોને માછીમારી ન કરવા માટે સૂચના આપવામાં આવી છે. રાજ્યમાં ભારે પવન સાથે કમોસમી વરસાદની શક્યતા છે, જેને પગલે બીજી સૂચના ન મળે ત્યાં સુધી માછીમારોને બીજા ટોકન ઈશ્યૂ કરવામાં ન આવે.
ઉપરાંત મત્સ્ય વિભાગ દ્વારા એવું પણ જણાવવામાં આવ્યું છે કે, જે માછીમારો હાલ દરિયો ખેડવા માટે ગયા છે તેઓને પણ તાત્કાલિક ધોરણે પાછા બોલાવવામાં આવે. જેથી કરીને કોઈ જાનમાલનું નુકસાન ન થાય. મહત્વનું છે કે, ૧૦ દિવસ અગાઉ પણ રાજ્યના વાતાવરણમાં ભારે પલટો જાેવા મળ્યો હતો. જે બાદ રાજ્યના અનેક વિસ્તારોમાં કમોસમી વરસાદ સાથે ભારે ઠંડીનો ચમકારો પણ જાેવા મળ્યો હતો. રાજ્યના અનેક વિસ્તારોમાં આખો દિવસ સુધી ગાઢ ધુમ્મસ પણ જાેવા મળ્યું હતું. ત્યારે ફરી એકવાર રાજ્યમાં માવઠું અને ભારે પવન ફૂંકાવાની શક્યતા રહેલી છે.