ગુજરાત વિધાનસભાની ચૂંટણીને લઈને આમ આદમી પાર્ટીએ તૈયારીઓ શરૂ કરી દીધી છે. પંજાબમાં જીત્યા પછી હવે ‘આપ’ની નજર ગુજરાત પર છે. ગુજરાતની ચૂંટણી જીતવા નવી વ્યુહરચના સાથે મેદાનમાં ઉતરવા માટે ‘આપ’ના ગુજરાત પ્રદેશ સંગઠનને વિખેરી નાખવામાં આવ્યું છે. બુધવારે પાર્ટી તરફથી જણાવાયું કે, પાર્ટીના ગુજરાત પ્રદેશ સંગઠનમાં પ્રદેશ પ્રમુખ સિવાય તમામ હોદ્દા રદ કરી દેવાયા છે. હવે, આગામી દિવસોમાં પાર્ટીનું નવું માળખું જાહેર કરાશે.
‘આપ’ના પ્રદેશ પ્રમુખ ગોપાલ ઈટાલિયા અને પ્રદેશ સંગઠન મહામંત્રી મનોજ સોરઠીયાએ પ્રેસ કોન્ફરન્સ યોજી માહિતી આપતા જણાવ્યું હતું કે, ગુજરાતમાં ભાજપને હરાવવા માટે અરવિંદ કેજરીવાલના માર્ગદર્શન હેઠળ નવી વ્યુહરચના ઘડવામાં આવશે. ગોપાલ ઈટાલિયાએ કહ્યું કે, ‘આપ’ને સમગ્ર ગુજરાતમાંથી સમર્થન મળી રહ્યું છે. પરિણામે આજે આમ આદમી પાર્ટી મુખ્ય વિપક્ષ તરીકે ઉભરી છે. તેમણે જણાવ્યું કે, ચૂંટણીની નવી રણનીતિ અંતર્ગત સંગઠન માળખાને નવેસરથી બનાવવામાં આવશે અને જેમણે પાર્ટીને આગળ વધારવામાં યોગદાન આપ્યું છે, તેમને નવા માળખામાં સ્થાન મળશે.
પ્રદેશ માળખાનું વિસર્જન કરવાના કારણ અંગે તેમણે જણાવ્યું કે, અત્યાર સુધીનું માળખું પાર્ટીની રચનાનું હતું. ગુજરાતના ખૂણે-ખૂણે પાર્ટીનો સંદેશો પહોંચાડવાનું હતું. પરંતુ હવે મુખ્ય વિપક્ષ તરીકે ભાજપ સામે આગામી વિધાનસભા ચૂંટણીમાં લડવા માટે નવી વ્યુહરચના સાથે નવું માળખું રજૂ કરવામાં આવશે. જાેકે, સૂત્રોનું કહેવું છે કે, ગુજરાતમાં આમ આદમી પાર્ટી દ્વારા પોતાનો પગદંડો જમાવવા છેલ્લા કેટલાક સમયથી એક પછી એક સભાઓ અને બેઠકોનું આયોજન કરાવવામાં આવી રહ્યું હતું. ખાસ કરીને, પંજાબમાં મળેલી જીત પછી પાર્ટીનો આત્મવિશ્વાસ ઘણો વધી ગયો છે અને તે હવે ગુજરાતમાં પોતાની હાજરી મજબૂત કરવા માગે છે.
જાેકે, ગત સોમવારે મહેસાણામાં યોજાયેલી તિરંગા યાત્રાને મળેલા નબળા પ્રતિસાદથી કેજરીવાલ વિફર્યા છે અને તેમને ગુજરાતમાં પાર્ટીની વ્યુહરચના બદલવાની જરૂરિયાત જણાઈ છે. જેને પગલે આજે એકાએક પાર્ટીના જૂના સંગઠનને વિખેરી નાખવામાં આવ્યું છે. ઉલ્લેખનીય છે કે, તાજેતરમાં ‘આપ’ના ઘણા નેતાઓ તાજેતરમાં ભાજપમાં જાેડાયા છે, જેને પગલે પણ પાર્ટીને પોતાના માળખામાં ફેરફાર કરવાની જરૂર હોવાનું જણાયું છે.