ગુજરાતમાં જાહેરમાં હત્યાના કિસ્સાઓ વધી રહ્યા છે. એ જ અરસામાં આજે સવારે પણ ઉપલેટામાં આવી એક ચકચારી ઘટના સામે આવી છે અને જેના કારણે સમગ્ર પંથકમાં હાહાકાર મચી ગયો છે. ઉપલેટામાં આજે સવારે સાડા દસ વાગ્યાની આસપાસ એક ડબલ મર્ડરની ઘટના પ્રકાશમાં આવી છે. યુવક-યુવતીને પોતાના જ ભાઈએ રહેંસી નાખ્યા છે. આ ઘટના પ્રેમ પ્રકરણને કારણે બની હોવાનું કહેવામાં આવી રહ્યું છે. લવ મેરેજના કારણે પોતાના જ ભાઈએ આવું કૃત્યુ કર્યું એવું જાણવા મળી રહ્યું છે.
વિગતો મળી રહી છે કે ઉપલેટાની જીગરિયા મસ્જિદ અને સતીમાની ડેરી વચ્ચે ખીરસરા ગામના અનિલ મનસુખભાઈ મહિડા (ઉં.વ.32) અને અરણી ગામની હીના સોમજીભાઈ સીગરખીયા (ઉં.વ.30)ને યુવતીના ભાઈએ છરીના આડેધડ ઘા મારી હત્યા કરી છે. ઘટનાની જાણ થતા જ પોલીસ કાફલો ઘટનાસ્થળે દોડી ગયો છે. થોડા દિવસો પહેલા જ યુવતીએ પોલીસ સ્ટેશનમાં પણ દવા પીધી હોવાનું સામે આવ્યું હતું. ત્યારે હાલમાં યુવક અને યુવતીનો મૃતદેહ ઘટનાસ્થળે પડ્યો જોવા મળ્યો હતો.