શહેરમાં દિવસે ને દિવસે ગુનાખોરીનો ગ્રાફ ઉંચો જઈ રહ્યો છે. ત્યારે પાંડેસરાના વડોદમાં પાંચ વર્ષની બાળકી પાડોશીની હવસનો શિકાર બનતા બચી ગઈ હતી. પાંચ વર્ષની માસૂમ બાળકીને પાડોશી બાઈક પર ફરવા લઈ જવાના બહાને વડોદમાં ઝાડીઝાંખરમાં લઈ ગયો હતો. આ પાડોશીએ પાંચ વર્ષની બાળકી સાથે શારીરિક અડપલાં કર્યા હતા. એ સમયે જ અહીંથી પસાર થઈ રહેલી મહિલા કોન્સ્ટેબલને શંકા ગઈ હતી. જેથી કોન્સ્ટેબલે જાેયુ તો પાડોશી પાંચ વર્ષની બાળકી સાથે ન કરવાનું ગંદુ કૃત્ય કરી રહ્યો હતો.
આખરે મહિલા કોન્સ્ટેબલે આ નરાધમ પાડોશીને રંગેહાથ ઝડપી પાડ્યો હતો. બાદમાં મહિલા કોન્સ્ટેબલે પોલીસને જાણ કરી હતી અને નરાધમ પાડોશીને પકડાવી દીધો હતો. આમ મહિલા કોન્સ્ટેબલની સતર્કતાથી પાંચ વર્ષની બાળકી પાડોશીની હવસનો શિકર બનતા બચી ગઈ હતી. પ્રાપ્ત રિપોર્ટ મુજબ, પાંડેસરાના વડોદ ખાતે રીનાબેન (નામ બદલ્યું છે) રહે છે. આમ તો તેઓ મૂળ બિહારના છે. તેઓ પોતાના પરિવાર સાથે અહીં રહે છે અને સંતાનમાં તેમને બે દીકરીઓ છે.
ગઈ ૧૮ ઓગસ્ટના રોજ આ ઘટના બની હતી. એ સમયે રીનાબેન પોડાશી મહિલા સાથે શાકભાજી ખરીદવા માટે ગયા હતા. એ સમયે બંને દીકરીઓ ટ્યુશન ક્લાસમાં ગઈ હતી. જ્યારે રીનાબેન શાકભાજી લઈને સાંજે પરત ફર્યા ત્યારે તેમની પાંચ વર્ષની દીકરી ઘરમાં હાજર નહોતી. એટલે રીનાબેને મોટી દીકરીને પૂછ્યું હતું. ત્યારે તેણે જણાવ્યું હતું કે, પાડોશમાં રહેતા પ્રમોદ અંકલ તેને બાઈક પર ફરવા લઈને ગયા છે. જેથી રીનાબેને પાડોશમાં રહેતા પ્રમોદની પત્નીને વાત કરી હતી અને તેઓએ પ્રમોદને ફોન કર્યો હતો.
આ ફોન પાંડેસરા પોલીસે ઉઠાવ્યો હતો. પોલીસે તેઓને પોલીસ સ્ટેશન બોલાવ્યા હતા. ત્યારે રીનાબેન તેમની સાથે પોલીસ સ્ટેશન પહોંચ્યા હતા. પોતાની દીકરી સાથે બનેલી ઘટના સાંભળીને તમામ લોકો ચોંકી ઉઠ્યા હતા. પ્રમોદની લંપટગિરી સામે આવી ગઈ હતી.
પોલીસના જણાવ્યા મુજબ, આરોપી પ્રમોદસિંહ રાજપૂત પાંચ વર્ષની બાળકીને બાઈક પર ફરવા લઈ જવાના બહાને વડોદ પહોંચ્યો હતો. બાદમાં બાળકીને તે ઝાડીઝાંખરમાં લઈ ગયો હતો. અહીં પહોંચ્યા બાદ આરોપીએ પાંચ વર્ષની બાળકી સાથે શારીરિક અડપલાં કર્યા હતા. આરોપી બાળકી સાથે પોતાની હવસ સંતોષવાની ફિરાકમાં હતો.
બરાબર એ જ સમયે સચીન જીઆઈડીસી પોલીસ સ્ટેશનમાં ફરજ બજાવતા મહિલા કોન્સ્ટેબલ સુહાનીબેન ત્યાંથી પસાર થયા હતા. મહિલા કોન્સ્ટેબલને અહીં શંકાસ્પદ હિલચાલ જણાઈ હતી. જેથી તેઓએ પોતાનું વાહન ઉભુ રાખ્યું હતું. બાદમાં તેઓએ ઝાડીઝાંખરમાં જઈ તપાસ હાથ ધરી હતી. આખરે તેઓએ આરોપી પાડોશી પ્રમોદને રંગેહાથ ઝડપી પાડ્યો હતો. જ્યારે તેઓએ બાળકીની પૂછપરછ કરી અને આખી ઘટના બહાર આવી હતી. બાદમાં તેઓએ પોલીસને જાણ કરી હતી. જે બાદ પાંડેસરા પોલીસે આરોપી પ્રમોદસિંહ રાજપૂતની ધરપકડ કરી હતી. પોલીસે આરોપી વિરુદ્ધ ગુનો નોંધીને આગળની કાર્યવાહી હાથ ધરી છે.