લીંબુના ભાવ આસમાને પહોંચ્યા બાદ ચોરીના અનેક કિસ્સાઓ સામે આવી ચૂક્યા છે. ત્યારે સુરતના અમરોલીમાંથી લીંબુના ભાવતાલને લઈને એક વિચિત્ર કિસ્સો સામે આવ્યો છે. લીબું વેચી રહેલાં અને ખરીદવા આવેલા યુવક વચ્ચે લીંબુના ભાવને લઈ માથાખૂટ થઈ હતી. આ માથાકૂટ ઉગ્ર બનતા વિકરાળ રુપ લીધુ હતુ. જે બાદ લીંબુનું વેચાણ કરતા શખસે ખરીદવા આવેલા યુવક પર છરીના ઘા ઝીકીને હત્યાનો પ્રયાસ કર્યો હતો.
જાહેરમાં જ આ ઘટના બનતા સમગ્ર વિસ્તારમાં હાહાકાર મચી ગયો હતો. તો આ ઘટનાના પગલે સ્થાનિક પોલીસે હત્યાનો ગુનો નોંધીને ત્રણ શખસોની ધરપકડ કરીને આગળની કાર્યવાહી હાથ ધરી છે.હાલ લીંબુના ભાવ આસમાને પહોંચ્યા છે. મધ્યમ વર્ગ પર મોંઘવારીનો વધુ એક માર પડ્યો છે. ત્યારે લીંબુની ચોરી થવાના પણ અનેક કિસ્સાઓ સામે આવી ચૂક્યા છે. થોડા દિવસો પહેલાં જ સુરતમાં લીંબુની વાડીમાંથી લીંબુની ચોરી થઈ હોવાની ઘટના સામે આવી હતી.
ત્યારે સુરતમાંથી ફરી લીંબુને લઈને એક વિવાદ સામે આવ્યો છે. લીંબુના ભાવતાલમાં યુવક પર છરીથી હુમલો કરવાની ઘટના બનતા સમગ્ર વિસ્તારમાં ચકચાર મચી ગઈ છે. પ્રાપ્ત રિપોર્ટ મુજબ, અમરોલીના છાપરાભાઠા રોડ પર આવેલા ગણેશપુરા પાસેની મધુવન સોસાયટીમાં રહેતા ઈસ્લામ શેખ દલાલીનો વ્યવસાય કરે છે. તેમનો ૨૧ વર્ષનો પુત્ર ઈમરાન ગઈ રાત્રે તક્ષશિલા સ્કૂલ સામે આવેલા શાક માર્કેટમાં ખરીદી કરવા માટે ગયો હતો.
આ ઘટના બાદ સમગ્ર વિસ્તારમાં હાહાકાર મચી ગયો હતો. ઈમરાન લોહીલુહાણ થઈ જતા આસપાસના લોકો મદદ માટે આવી પહોંચ્યા હતા. ગંભીર રીતે ઈજાગ્રસ્ત થયેલા ઈમરાનને તાત્કાલિક સારવાર માટે હોસ્પિટલમાં ખસેડવામાં આવ્યો હતો. જાણ થતા પોલીસની ટીમ ઘટના સ્થળે પહોંચી હતી. પોલીસે આ મામલે હત્યાના પ્રયાસનો ગુનો નોંધીને આગળની કાર્યવાહી હાથ ધરી હતી. જે બાદ પોલીસે ત્રણ શખસોની ધરપકડ કરીને આગળની તજવીજ હાથ ધરી છે