જો આંકડા સામે આવ્યા છે એ પ્રમાણે વાત કરીએ તો ગુજરાતમાં હજુ સુધી સીઝનનો 76 ટકા વરસાદ નોંધાયો છે. સાબરકાંઠામાં ખેડબ્રહ્મા, વડાલી, રવિપુરા સહિતના ગ્રામ્ય વિસ્તારોમાં મેઘો ધોધમાર વરસ્યો છે. વડાલીમાં એક જ કલાકમાં એક ઇંચ વરસાદ વરસતા ખેડૂતો ખુશખુશાલ જોવા મળ્યા હતા. ત્યારે હવે . લો પ્રેશરને કારણે ગુજરાતમાં ભારેથી અતિભારે વરસાદ થશે. આજે સોમવારથી લઈને શુક્રવાર સુધી વરસાદી માહોલ જામશે. હવામાન વિભાગના જણાવ્યા પ્રમાણે, દક્ષિણ ગુજરાત અને સૌરાષ્ટ્રના કેટલાક વિસ્તારોમાં ભારેથી અતિભારે વરસાદની આગાહી છે.
સાથે સાથે જ હવામાન વિભાગે આગાહી કરી હતી કે દક્ષિણ ગુજરાત, સૌરાષ્ટ્રના કેટલાક જિલ્લામાં રેડ એલર્ટ જાહેર કરાયું છે. હવામાન અંગે આગાહી કરતી ખાનગી સંસ્થાના મતે અમદાવાદમાં મંગળવારથી ગુરુવાર સુધી મધ્યમથી ભારે વરસાદ પડે એવી સંભાવના છે. ત્યારે આગાહી બાદ લોકોમાં પણ એક ખુશીનો માહોલ જોવા મળી રહ્યાં છે અને ખાસ અમદાવાદીઓને ગરમીથી રાહત અનુભવાય એવા સંકેત જોવા મળી રહ્યા છે.
વિગતો મળી રહી છે કે છેલ્લા 24 કલાક દરમિયાન રાજ્યના 100 તાલુકામાં વરસાદ નોંધાયો છે, જેમાં સૌથી વધારે વરસાદ અમરેલી જિલ્લાના લાઠી શહેરમાં 65 એમ.એમ. નોંધાયો છે. અમરેલી જિલ્લાના બાબરામાં પણ 65 એમ.એમ. વરસાદ પડ્યો છે. ગુજરાતમાં અત્યારસુધી સરેરાશ 76.21 ટકા વરસાદ પડ્યો છે, જેમાં કચ્છમાં 125.60 ટકા, ઉત્તર ગુજરાતમાં 62.59 ટકા, સૌરાષ્ટ્રમાં 71.05 ટકા, પૂર્વ-મધ્ય ગુજરાતમાં 65.68 ટકા અને દક્ષિણ ગુજરાતમાં 87.39 ટકા સરેરાશ વરસાદ પડ્યો છે. ત્યારે આ આગાહીમાં હજુ વધારે વરસાદ પડે એવી પણ સંભાવના જોવા મળી રહી છે.