એડવાન્સમાં ટ્રેન કે પછી ફ્લાઈટની ટિકિટ બુક કરાવવાનું તો જાણે સાવ સામાન્ય છે, પરંતુ કિન્નરોને એડવાન્સમાં બોણી આપવાની તમે કલ્પના પણ કરી શકો? વાત ભલે માન્યામાં ના આવે, પરંતુ ડાયમંડ સિટી સુરતમાં હવે આવી જ સિસ્ટમ શરુ થઈ છે. સારા પ્રસંગે તેમજ વાર-તહેવારે સુરતીઓ કિન્નરોના આશીર્વાદ લેવાનું ચૂકતા નથી, અને તેઓ તેમને બોણી આપવામાં પણ ક્યારેય આનાકાની નથી કરતા. જાેકે, અગાઉ કિન્નરો યજમાનના ઘરે જઈને બોણી લેતા હતા, પરંતુ હવે તેમણે એડવાન્સમાં બોણી લઈ તેની રિસિપ્ટ આપવાનું પણ શરુ કર્યું છે.
સુરતના નાનપુરા વિસ્તારમાં આવેલી હિજડા વાડમાં કિન્નરોના ઘર આવેલા છે. અહીં જ એડવાન્સમાં બોણી સ્વીકારીને પહોંચ આપવામાં આવે છે. જ્યાં કોઈપણ વ્યક્તિ પોતાના ઘરનું કે કામધંધાના સ્થળનું સરનામું લખાવી પૈસા આપી જાય છે. ત્યારબાદ પણ જાે કોઈ કિન્નર તેમના ઘરે કે કામધંધાના સ્થળે પહોંચે તો યજમાને એડવાન્સ બોણીની પહોંચ બતાવી દેવાની રહે છે.
આ અંગે કિન્નર પાયલ કુંવરે જણાવ્યું હતું કે આ સિસ્ટમ સુરત પૂરતી જ મર્યાદિત છે. એડવાન્સમાં બોણી આપનારાને જે પહોંચ આપવામાં આવે છે તે તેણે પોતાની દુકાન કે ઓફિસની બહાર દેખાય તે રીતે લગાવી દેવાની રહે છે. જેને જાેઈ બીજા કોઈ કિન્નર તેની પાસેથી બોણી નથી લેતા. પાયલ કુંવર સુરતના દક્ષિણના વિસ્તારોમાં બોણી ઉઘરાવે છે. આ સિવાય તેઓ કિન્નર સમુદાય પ્રત્યે સામાન્ય લોકોમાં જાગૃતિ ફેલાવવાનું કામ પણ કરે છે.
જાેકે, કેટલાક કિન્નરોને આ સિસ્ટમ માન્ય નથી. તેમની દલીલ છે કે તેનાથી યજમાન સાથે ભાવતાલ કરવાનો મોકો જ નથી મળતો.કેટલાક કિન્નરોની દલીલ છે કે, તેઓ યજમાનની નાણાકીય સ્થિતિ જાેઈને બોણીની ડિમાન્ડ કરતા હોય છે. મોટાભાગના યજમાન થોડી રકઝક બાદ કિન્નરોને મો માગી બોણી આપવા તૈયાર પણ થઈ જતા હોય છે. પરંતુ જાે તેઓ એડવાન્સમાં જ બોણી લખાવી જાય તો કિન્નરોને ભાવતાલનો મોકો જ નથી મળતો.
બીજી તરફ, નુરી કુંવર જેવા કિન્નર આ સિસ્ટમને સારી ગણાવતા કહે છે કે, ભૂતકાળમાં કિન્નરો પર લોકોના ઘરે શુભપ્રસંગે પહોંચીને બોણી માટે બબાલ કરવાના આક્ષેપ થતા હતા. પરંતુ, એડવાન્સમાં બોણી લેવાની સિસ્ટમથી હવે તેવું કંઈ થવાને અવકાશ જ નથી રહેતો.
લગ્ન, બાળકના જન્મ, મુંડન, ગૃહ પ્રવેશ તેમજ નવી દુકાનો અને ઓફિસોના ઉદ્ઘાટન વખતે કિન્નરો ઘણીવાર હજારો રુપિયાની બોણી ઉઘરાવતા હોય છે. કેટલીકવાર યજમાન મો માંગી બોણી આપવા તૈયાર ના હોય તો મોટી બબાલ પણ થઈ જતી હોય છે. સુરતમાં તો કિન્નરોએ વિસ્તારો પણ વહેંચી લીધા છે. સામાન્ય રીતે એક કિન્નર બીજા કિન્નરના વિસ્તારમાં બોણી માગવા જવાનું પણ ટાળે છે.