માણસામાંથી વધુ એક કબૂતરબાજીનો કિસ્સો સામે આવ્યો છે. માણસાનો યુવક કેનેડા જવા માટે નીકળ્યો હતો અને બાદમાં તે કોલકત્તાથી ગાયબ થઈ ગયો હતો. ત્યારે તેના પરિવારજનોએ પોલીસ સમક્ષ એવી આશંકા વ્યક્ત કરી છે કે તેને અજ્ઞાત જગ્યાએ ગોંધી રાખ્યો હોઈ શકે છે. યુવકને કેનેડા મોકલવા માટે પરિવારે ૫૦ લાખમાં ડીલ નક્કી કરી હતી. પરંતુ યુવક કેનેડા પહોંચ્યો નહોવાથી પરિવાર ચિંતામાં મુકાયો છે.
એજન્ટોએ યુવકને કેનેડાથી અમેરિકા મોકલવાની ખાતરી આપી હતી. ત્યારે એજન્ટોની ભૂમિકા પણ શંકાસ્પદ લાગી રહી છે. પોલીસે આ મામલે ગુનો નોંધીનેઆગળની કાર્યવાહી હાથ ધરી છે. પ્રાપ્ત વિગતો મુજબ, માણસાના પરબતપુરામાં રહેતા અને ઈલેક્ટ્રિકનો વ્યવસાય કરતા પરેશભાઈ પટેલે ગાંધીનગરના સરગાસણ ખાતે રહેતા પોતાના સાળા અંકિતકુમારને અમેરિકા મોકલવા માટે પરબતપુરા ગામના રમણભાઈ અમથારામ પટેલ સાથે બે મહિના પહેલાં વાતચીત કરી હતી.
એ વખતે રમણભાઈએ અમદાવાદના એજન્ટ દિપક ભૂપેન્દ્રભાઈ પટેલ અને ઋષભ સુરેન્દ્રકુમાર શાહનો સંપર્ક કરાવ્યો હતો. આ બંને એજન્ટોએ તેમને એવી ખાતરી આપી હતી કે તેઓ અંકિતને કાયદેસરના અમેરિકાના વીઝા અપાવી કેનેડા થઈ અમેરિકા મોકલી દેશે. અંકિત જ્યારે કેનેડા પહોંચે ત્યારે અડધી રકમ આપવાનું નક્કી થયું હતું. અમેરિકા મોકલવાની ડીલ ફાઈનલ થયા બાદ ગઈ ૬ જુલાઈના રોજ સાંજે પરિવારે ૩૦૦૦ કેનેડિયન ડૉલર સાથે અંકિતને અમદાવાદ એરપોર્ટ પરથી કોલકત્તા મોકલી આપ્યો હતો.
કોલકત્તા પહોંચ્યા પછી અંકિતે પરિવારને ફોન કર્યો હતો અને સાગરભાઈ તથા વિજયભાઈ તેને લેવા માટે આવ્યા હોવાની જાણ કરી હતી. બીજા દિવસે અમદાવાદના એજન્ટે પરેશભાઈને ફોન કર્યો હતો અને કહ્યું હતું કે, અમેરિકન ડૉલર લેવા પડશે. જેથી માણસાથી આંગડિયા દ્વારા કોલકત્તા ખાતે અંકિતને એક લાખ રુપિયા મોકલ્યા હતા. એ સાંજે અંકિતે ફોન કરીને કહ્યું કે, રાત્રે દિલ્હીની ફ્લાઈટ છે અને ત્યાંથી કેનેડા જવાનું છે. બાદમાં મોડી રાત્રે તેણે કેનેડા જવા નીકળી ગયો હોવાનું જણાવ્યું હતું.
પરિવારજનોએ ખાતરી કરાવવા માટે અંકિતને વિડીયો કોલ કરવાનું કહેતા તેનો ફોન બંધ થઈ ગયો હતો. જેથી પરેશભાઈએ કેનેડાના ટોરેન્ટોમાં રહેતા પોતાના પરિચિતને આ વાતની જાણ કરી હતી. બાદમાં આ પરિચિતે એરપોર્ટ પર અંકિતની લાંબો સમય સુધી રાહ જાેઈ હતી, પણ અંકિત ત્યાં પહોંચ્યો નહોતો. બીજા દિવસે અંકિતે વિડીયો કોલ કરીને કહ્યું કે તે કેનેડા પહોંચી ગયો છે. જ્યારે તેમના પરિચિત દ્વારા એવું કહેવાયુ કે તે પહોંચ્યો નથી. એટલે પરિવારને પણ દાળમાં કંઈ કાળુ લાગ્યું હતું.
પરિવારને શંકા ગઈ અને અંકિતને આજુબાજુનું લોકેશન બતાવવાનું કહેતા તેનો ફોન બંધ થઈ ગયો હતો. બીજી તરફ, શરત મુજબ અમદાવાદના એજન્ટો રુપિયા ૨૨ લાખની ઉઘરાણી કરવા લાગ્યા હતા. જેથી પરેશભાઈએ એવું જણાવ્યું હતું કે, અંકિત કેનેડા પહોંચી ગયો છે એની પાકી ખાતરી થઈ ગયા બાદ તે રુપિયા આપી દેશે. એટલે અમદાવાદના જમાલપુરમાંથી સરફરાજ અહેમદ હુસેન કકુવાલા અને ગુલવાલા નામના બે ઈસમો પરેશભાઈને મળવા માટે આવ્યા હતા.
આં બંને શખસોએ રુપિયા ૨૨ લાખની માંગણી કરી હતી. જ્યારે પરિવારે અંકિત ખરેખરમાં ક્યાં છે એ પૂછતા તેઓ સંતોષકારક જવાબ આપી શક્યા નહોતા. બાદમાં પરેશભાઈ અને અંકિતના પરિવારને શંકા ગઈ કે, રુપિયા પડાવવાના ઈરાદે તેને અજ્ઞાત જગ્યાએ ગોંધી રાખ્યો છે. જેથી પરેશભાઈએ માણસા પોલીસ સ્ટેશનમાં નવ શખસ વિરુદ્ધ ફરિયાદ નોંધાવી હતી. જે બાદ પોલીસે ગુનો નોંધીને આગળની કાર્યવાહી હાથ ધરી છે.