જામનગર શહેર અને જિલ્લામાં આવેલા પર્યટન સ્થળો ઉપર ફરવા આવેલા યુગલોના વીડિયો ઉતારી સોશિયલ મીડિયામાં વાયરલ કરી દેવાની ધમકી આપી તોડ કરતા બે લેભાગુ પત્રકારોને જામનગર સાયબર ક્રાઇમની ટીમે પકડી પાડી સીમકાર્ડ, મેમરીકાર્ડ, ડેબીટ કાર્ડ્સ, મોબાઇલ, ટેબલેટ, માકઇ, ઓળખકાર્ડ અને ગાડી સહિતના મુદામાલ સાથે દબોચી લીધા હતા. બ્લેક મેઇલ કરનારા ખંભાળીયાના આ બંને શખ્સોએ કેટલા લોકોને શિકાર બનાવ્યા છે તેની પણ પોલીસ હવે તપાસ કરી રહી છે.
મળતી માહિતી મુજબ જામનગર શહેર-જિલ્લાના પર્યટન સ્થળો ઉપર ફરવા આવતા યુગલોના વીડિયો ઉતારી તેઓને બદનામ કરવાનો ભય બતાવી તેમના વીડિયો વાયરલ કરી દેવાની ધમકી આપી તેમની પાસેથી તોડ કરતા હોવાની અવાર-નવાર ફરિયાદો ઉઠવા પામી હતી. તે દરમિયાન ગત ૨ જુલાઈના રોજ લાખાબાવળ પાસે એક યુવક અને યુવતીનો આરોપીઓએ વીડિયો બનાવી લીધો હતો અને સોશિયલ મીડિયામાં વાઈરલ કરવાની ધમકી આપી દોઢ લાખ રૂપિયાની માગણી કરી હતી. આરોપીઓએ ફરિયાદી પાસેથી ૨૦ હજાર રૂપિયા પડાવી લીધા હોવાનો ખુલાસો થયો છે.
ભોગ બનેલા કપલ પૈકી યુવકે પોલીસમાં આ અંગે ફરિયાદ કરી હીત જે બાદ ઉચ્ચ કક્ષાએથી મળેલા આદેશ અનુસાર સાયબર ક્રાઈમ પોલીસે આ લેભાગુ પત્રકારોને ઝડપી લેવા માટે તપાસ શરુ કરી હતી. જેમાં જાણવા મળ્યું કે લાલપુર બાયપાસ પાસે મોપેડ પર બે શખ્સો નીકળેલા છે જેઓ પોતાને પત્રકાર ગણાવે છે અને કપલ્સના વીડિયો ઉતારી તોડ કરવાની ફિરાકમાં આંટાફેરા કરે છે. જે હકીકતના આધારે સ્ટાફ દ્વારા લાલપુર બાયપાસ પાસે વોચ ગોઠવવામાં આવી હતી અને તે દરમિયાન નીકળેલા બે શખ્સોને અટકાવી પૂછપરછ કરતા તેમની પાસેથી એક્સપાયર થઈ ગયેલું પત્રકારનું આઇડી કાર્ડ મળી આવ્યું હતું.
પોલીસે તપાસ કરતાં બંને બોગસ પત્રકાર હતા. જે બાદ બંનેની ધરપકડ કરી પોલીસ દ્વારા બંનેની પાસેથી ટેબ્લેટ-૦૧,મોબાઇલ ફોન-૦૩, પેનડ્રાઈવ- ૧૦, એકસ્ટ્રા સીમકાર્ડ-૦૨, મેમરીકાર્ડ-૦૨, ડેબિટ કાર્ડ -૦૩, અલગ-અલગ ઓળખકાર્ડ-૦૪, આંબેડકર દર્પણ લખેલ માઇક-૦૧, ટી.વી એસ.જયુપીટર -૦૧ અને રોકડ રકમ રુ.૧૯૩૦ નો મુદામાલ કબ્જે કરેલ છે. આ ઉપરાંત ખાસ મોડસ ઓપરેન્ડીથી ગુનાને અંજામ આપનારા કહેવાતા પત્રકારો ઝડપાયા છે. પોલીસને આશંકા છે કે, આરોપીઓએ આ ઉપરાંત અન્ય લોકોને પણ ટાર્ગેટ બનાવ્યા હોય શકે. જેથી જાે આ શખ્સોનું કોઈ ભોગ બન્યું હોય તો પોલીસ સમક્ષ આવવા અપીલ કરવામાં આવી છે.