હિજાબ વિવાદ વચ્ચે કર્ણાટકના ઉડુપી જિલ્લા પ્રશાસને જિલ્લામાં તમામ હાઈસ્કૂલોની આજુબાજુ વિસ્તારમાં ૧૪ ફેબ્રુઆરીથી લઈને ૧૯ ફેબ્રુઆરી સુધી કલમ ૧૪૪ લાગૂ કરી દીધી છે. આ દરમિયાન હાઈસ્કૂલોના ૨૦૦ મીટરના દાયરામાં ભેગા થવા પર રોક લાગશે. કોઈ પણ પ્રકારના સરઘસ અને નારેબાજી પર પ્રતિબંધ રહેશે. અત્રે જણાવવાનું કે ઉડુપી જિલ્લા પ્રશાસનનો આ આદેશ ૧૪ ફેબ્રુઆરીના રોજ સવારે ૬ વાગ્યાથી લઈને ૧૯ ફેબ્રુઆરીની સાંજે ૬ વાગ્યા સુધી લાગુ રહેશે.
આદેશ મુજબ હાઈસ્કૂલોના ૨૦૦ મીટરના દાયરાની અંદર પાંચ કે તેનાથી વધુ લોકોના ભેગા થવા પર રોક રહેશે. પ્રદર્શન અને રેલીઓ પર પ્રતિબંધ રહેશે. નારેબાજી કરવા, ગીત ગાવા કે ભાષણ દેવા પર કડક પ્રતિબંધ રહેશે. શાળાઓ સોમવારથી ફરી ખુલવાની સાથે આ પગલાંને સુરક્ષા કારણોસર જાેવામાં આવી રહ્યું છે. વિદ્યાર્થીઓના પ્રદર્શનની સ્થિતિ ફરીથી ઊભી ન થાય તે માટે કલમ ૧૪૪ લાગૂ કરવામાં આવી છે. અત્રે જણાવવાનું કે કલમ ૧૪૪ લાગૂ થયા બાદ વિસ્તારમાં પૂતળું બાળવું, ફટાકડા ફોડવા, હથિયારો અને પથ્થર લઈ જવા કે દેખાડવા, જાહેરમાં મીઠાઈ વહેંચવી અને જાહેર સ્થળ પર કોઈ પણ પ્રકારનો અસભ્ય વ્યવહાર કરવો પ્રતિબંધિત રહેશે.
નોંધનીય છે કે કર્ણાટક હાઈકોર્ટે હિજાબ વિવાદ પર સુનાવણી કરતા ગુરુવારે આદેશ આપ્યો હતો કે અંતિમ આદેશ સુધી વિદ્યાર્થીઓ માટે કોઈ પણ ધાર્મિક પ્રતિકની મંજૂરી નથી. હાઈકોર્ટના આ વચગાળાના આદેશ બાદ હવે શાળા અને કોલેજાેમાં હિજાબ અને ભગવા શાલ બંનેના ઉપયોગ પર પ્રતિબંધ રહેશે. કર્ણાટક હાઈકોર્ટની બેન્ચે કહ્યું કે રાજ્યમાં શાંતિ થવી જરૂરી છે અને શાળા કોલેજ જલદી ખુલવા જાેઈએ.
હિજાબ વિવાદની શરૂઆત ગત મહિને ઉડુપી ગવર્મેન્ટ પ્રી યુનિવર્સિટી કોલેજની કેટલીક વિદ્યાર્થીનીઓ હિજાબ પહેરીને કોલેજ પરિસરમાં આવી ત્યારથી થઈ. જેમને ક્લાસમાં જવાની મંજૂરી અપાઈ નહતી. કોલેજના અધિકારીઓનું કહેવું છે કે જે વિદ્યાર્થીનીઓ પહેલા હિજાબ વગર આવતી હતી તે હવે અચાનક હિજાબ પહેરીને આવવા લાગી છે. ત્યારબાદ વિદ્યાર્થીનીઓએ હિજાબ વગર ક્લાસમાં આવવાનો ઈન્કાર કરરતા વિરોધ પ્રદર્શન કર્યું. આ મુદ્દો એક વિવાદ બની ગયો અને હવે દેશમાં અનેક જગ્યાએ તેને લઈને પ્રદર્શન થઈ ચૂક્યું છે.