યુક્રેન અને રશિયા વચ્ચે 24 ફેબ્રુઆરીથી શરૂ થયેલું યુદ્ધ હજુ પણ ચાલુ છે. બંને દેશો વચ્ચેના યુદ્ધનો આજે 30મો દિવસ છે. તમામ પ્રયાસો છતાં રશિયા-યુક્રેન યુદ્ધ રોકવા માટે હજુ સુધી કોઈ ઉકેલ સુધી પહોંચી શક્યા નથી. ચારેબાજુ દબાણ વચ્ચે હવે રશિયા તરફથી પરમાણુ હુમલાનો ખતરો વધી ગયો છે. રશિયાએ છેલ્લા 24 કલાકમાં બે વખત યુક્રેન પર પરમાણુ હુમલો કરવાની ધમકી આપી છે.
યુક્રેન પર હુમલાને લઈને પશ્ચિમી દેશો રશિયા પર સતત દબાણ કરી રહ્યા છે. યુક્રેન પર ચાલી રહેલા રશિયન હુમલાને લઈને ગુરુવારે નાટો અને અમેરિકા વચ્ચે બેઠક પણ થવાની છે. નાટોના દરેક પગલાથી રશિયાનો રોષ સામે આવી રહ્યો છે. યુક્રેન પર પરમાણુ હુમલાની તાજેતરની ધમકી યુએસમાં રશિયાના ડેપ્યુટી એમ્બેસેડર દિમિત્રી પોલિઆન્સકી તરફથી આવી છે. આ પહેલા ક્રેમલિનના પ્રવક્તા દિમિત્રી પેસ્કોવે યુક્રેન પર પરમાણુ હુમલાની વાત કરી હતી. 24 કલાકમાં રશિયા તરફથી યુક્રેન પર પરમાણુ હુમલાની આ બીજી ધમકી છે.
દિમિત્રી પોલિઆન્સકીએ કહ્યું છે કે જો નાટો (નોર્થ એટલાન્ટિક ટ્રીટી ઓર્ગેનાઈઝેશન) રશિયાને ઉશ્કેરે છે તો અમને પરમાણુ હથિયારોનો ઉપયોગ કરવાનો અધિકાર છે. આજે એક મુલાકાતમાં, દિમિત્રી પોલિઆન્સકીએ કહ્યું હતું કે જો રશિયાને અસ્તિત્વ માટેના જોખમનો સામનો કરવો પડશે તો પુતિન પરમાણુ શસ્ત્રોનો ઉપયોગ કરશે. એક દિવસ પહેલા બુધવારે ક્રેમલિનના પ્રવક્તા દિમિત્રી પેસ્કોવે યુક્રેન પર પરમાણુ હુમલાની વાત કરી હતી. તેણે કહ્યું હતું કે જો રશિયાને “અસ્તિત્વના જોખમ”નો સામનો કરવો પડશે તો તે પરમાણુ હથિયારોનો ઉપયોગ કરશે. ઉલ્લેખનીય છે કે રશિયા પાસે વિશ્વમાં પરમાણુ શસ્ત્રોનો સૌથી મોટો માલ છે.
રશિયા-યુક્રેન યુદ્ધને લઈને આજે નાટોની મહત્વપૂર્ણ બેઠક યોજાવા જઈ રહી છે. આ બેઠકમાં અમેરિકા અને નાટો રશિયાને ઘેરવાની યોજના તૈયાર કરી શકે છે. અમેરિકી રાષ્ટ્રપતિ જો બિડેન પણ આ બેઠકમાં હાજરી આપશે. આ પછી શુક્રવારે બિડેનની પોલેન્ડની મુલાકાત છે. પોલેન્ડમાં બિડેનની એક બેઠક પણ થશે, જેમાં રશિયા વિરુદ્ધ આગળનો એજન્ડા નક્કી થઈ શકે છે. બીજી તરફ યુક્રેનના રાષ્ટ્રપતિ વોલોડીમિર ઝેલેન્સ્કી જેઓ યુદ્ધ લડી રહ્યા છે, તેઓ વારંવાર વિશ્વને રશિયા પર દબાણ લાવવા અને યુદ્ધ રોકવાની અપીલ કરી રહ્યા છે. ઝેલેન્સકીએ કહ્યું છે કે તમામ દેશોએ સાથે મળીને રશિયાને રોકવું પડશે. રશિયાના કડક વલણને કારણે પુતિન પણ પોતાના દેશમાં ઘેરાવા લાગ્યા છે. યુક્રેન પર રશિયન હુમલા વિરુદ્ધ રશિયામાં અવાજો ઉઠવા લાગ્યા છે.