Retail Inflation : શાકભાજીના (vegetables) વધેલા ભાવને કારણે જુલાઈમાં છૂટક મોંઘવારી દરે (Retail Inflation Rate) 15 મહિનાનો રેકોર્ડ તોડી નાખ્યો છે. સરકાર દ્વારા જારી કરવામાં આવેલા આંકડા અનુસાર રિટેલ મોંઘવારી દર 7.44 ટકા પર પહોંચી ગયો છે. જૂન મહિનામાં ગ્રાહક ભાવ સૂચકાંક આધારિત ફુગાવો 4.87 ટકા હતો. તે જ સમયે, ગયા વર્ષે જુલાઈ મહિનામાં તે 6.71 ટકા હતો. જુલાઈ 2023 પહેલા, છૂટક ફુગાવાનો દર એપ્રિલ 2022માં સૌથી વધુ 7.79 ટકા હતો. જુલાઈમાં કન્ઝ્યુમર ફૂડ ઈન્ડેક્સ ફુગાવો વધીને 11.51 ટકા થયો હતો. જ્યારે ફૂડ એન્ડ બેવરેજીસ બાસ્કેટમાં ફુગાવો વધીને 10.57 ટકા થયો હતો. જૂનમાં શાકભાજીમાં છૂટક ફુગાવો -0.93 ટકા હતો. જુલાઈમાં તે વધીને 37.34 ટકા થયો હતો.
મોંઘવારી ક્યાં સુધી ઘટશે?
“અમારા મતે, શાકભાજીની ખેતીના ટૂંકા ચક્ર અને ભાવો ઘટાડવા માટે સરકાર દ્વારા કેટલાક પગલાઓ સાથે, શાકભાજીના ભાવોનું આટલું ઊંચું સ્તર નવેમ્બર-ડિસેમ્બર 2023 પછી પણ ચાલુ રહેવાની સંભાવના નથી,” એક્યુટ રેટિંગ્સ એન્ડ રિસર્ચના સંશોધન વડા સુમન કુમાર ચૌધરીએ બિઝનેસ ટુડેને જણાવ્યું હતું. આથી બેથી ત્રણ મહિના બાદ ખાદ્યાન્ન ફુગાવો ઘટે તેવી શક્યતા છે.
આરબીઆઈ વધારશે ટેન્શન
રિટેલ ફુગાવાના લેટેસ્ટ આંકડાથી રિઝર્વ બેન્કનું ટેન્શન વધી ગયું છે. સતત ચાર મહિના સુધી નિયંત્રણમાં રહ્યા બાદ રિટેલ મોંઘવારી દરમાં ફરી એકવાર ઉછાળો આવ્યો છે. જુલાઈ મહિનામાં રિટેલ મોંઘવારી દર રિઝર્વ બેંક દ્વારા નક્કી કરવામાં આવેલા 2-6 ટકાના લક્ષ્યને પાર કરી ગયો છે. જણાવી દઈએ કે હાલમાં જ સંપન્ન થયેલી મૌદ્રિક નીતિની બેઠકમાં રિઝર્વ બેંકે રેપો રેટમાં કોઈ ફેરફાર કર્યો નથી. મોંઘવારી લક્ષ્યથી ઉપર ગયા બાદ રિઝર્વ બેંક પર રેપો રેટ વધારવાનું દબાણ આવી શકે છે.
જથ્થાબંધ ફુગાવામાં ઘટાડો
જો કે બીજી તરફ આજે આવેલા જથ્થાબંધ મોંઘવારીના આંકડામાં રાહતના સંકેત દેખાઈ રહ્યા છે. જથ્થાબંધ મોંઘવારીના મોરચે જુલાઈ મહિનામાં લોકોને રાહત મળી છે. જુલાઈમાં પણ જથ્થાબંધ ભાવાંક નકારાત્મક ઝોનમાં રહ્યો હતો. જથ્થાબંધ મોંઘવારી -1.36 ટકા ઘટી છે. જૂનમાં જથ્થાબંધ ફુગાવો -4.12 ટકા ઘટ્યો હતો. આ સતત ચોથો મહિનો છે જ્યારે ખાદ્ય ઉત્પાદનોના વધતા ભાવો વચ્ચે જથ્થાબંધ ફુગાવાનો સૂચકાંક શૂન્યથી નીચે છે.