કોંગ્રેસના પૂર્વ અધ્યક્ષ રાહુલ ગાંધીનો પબમાં પાર્ટી કરતા એક વિડીયો વાયરલ થઈ રહ્યો છે. ભાજપના નેતા અમિત માલવીયે એક વિડીયો ટિ્વટ કરીને રાહુલ ગાંધી પર કટાક્ષ કર્યો છે. આ દરમિયાન કોંગ્રેસે સ્પષ્ટતા કરતા કહ્યું કે, રાહુલ ગાંધી તેમના એક મિત્રના લગ્નમાં સામેલ થવા માટે ગયા છે અને લગ્ન સમારોહમાં જવું એ કોઈ ગુનો તો નથી.
ભાજપ આઈટી સેલના હેડ અમિત માલવીયે પોતાના ટિ્વટર હેન્ડલથી રાહુલ ગાંધીનો એક યુવતી સાથે વાતચીત કરતો વિડીયો ટિ્વટ કર્યો છે. ટિ્વટ કરીને તેઓએ લખ્યું છે કે, જ્યારે મુંબઈ પર હુમલો થયો ત્યારે રાહુલ ગાંધી એક નાઈટ ક્લબમાં હતા. જ્યારે તેમની પાર્ટીમાં ઉથલપાથલ થઈ રહી છે ત્યારે પણ તેઓ ત્યાં જ છે. તેમનામાં સાતત્યતા છે.
રાહુલ ગાંધીના વાયરલ વિડીયો પર કોંગ્રેસે સ્પષ્ટતા કરી છે. પાર્ટી પ્રવક્તા રણદીપ સિંહ સુરજેવાલાએ જણાવ્યું કે, રાહુલ ગાંધી પાડોશી દેશ નેપાળમાં એક લગ્ન સમારોહમાં ભાગ લેવા માટે ગયા છે. સુરજેવાલાએ કટાક્ષભર્યા અંદાજમાં કહ્યું કે, રાહુલ ગાંધી પીએમ મોદીની જેમ બોલાવ્યા વગર પાકિસ્તાનના પ્રધાનમંત્રીના ત્યાં કેક કાપવા નથી ગયા. કોંગ્રેસ પ્રવક્તા સુરજેવાલાએ કહ્યું કે, એક ખાનગી લગ્ન સમારોહમાં સામેલ થવું એ ગુનો હોય એવું તો જાહેર થયું નથી.
રાહુલ ગાંધીના આ વાયરલ વિડીયો પર ભાજપે રાહુલ ગાંધી પર જબરા કટાક્ષ કર્યા છે. કેન્દ્રીય મંત્રી કિરેન રિજિજૂએ વિડીયો શેર કરતા કહ્યું કે, સતત પાર્ટીઓ, રજાઓ, પ્લેઝર ટ્રિપ, પ્રાઈવેટ ફોરેન વિઝિટ વગેરે હવે દેશ માટે કોઈ નવી વાત રહી નથી. ભાજપના પ્રવક્તા શહઝાદ પૂનાવાલાએ કહ્યું કે, રાજસ્થાન ભડકે બળી રહ્યું છે અને રાહુલ ગાંધી પાર્ટી કરી રહ્યાં છે. રાહુલ ગાંધી પાર્ટ ટાઈમ રાજનેતા નથી પરંતુ પાર્ટી ટાઈમ રાજનેતા છે. આ પહેલીવાર બન્યું નતી. યાદ કરો એ ૨૬-૧૧ વખતનો પાર્ટી ટાઈમ.
સામે આવેલા રિપોર્ટ મુજબ, રાહુલ ગાંધી કાઠમાંડૂમાં એક રિપોર્ટર સુમનીમા ઉદાસના લગ્નમાં સામેલ થવા માટે ગયા છે. જે નેપાળમાં મ્યાનમારના રાજદૂતની દીકરી છે અને આ તેમનો એક ખાનગી પ્રવાસ છે. રિપોર્ટર સુમનીમાના લગ્ન નીમા માર્ટિન શેરપા સાથે થઈ રહ્યા છે. દુલ્હનનાપિતા ભીમે જણાવ્યું કે, મંગળવારે આ લગ્ન યોજાશે અને પાંચ મેના રોજ બૌદ્ધ સ્થિત હયાત રેજન્સી હોટલમાં એક રિસેપ્શનનું આયોજન કરવામાં આવ્યું છે. સામે આવેલા રિપોર્ટ મુજબ, આ લગ્નમાં ભારતના કેટલાંક વીવીઆઈપી લોકો પણ પહોંચ્યા છે.