Gujarat News : હવામાન નિષ્ણાત (Meteorologist) અંબાલાલ પટેલે (Ambalal Patel) વધુ એક આગાહી કરી છે. તેમણે જણાવ્યું હતું કે આગામી દિવસોમાં વધુ એક સિસ્ટમ બનશે. તેમણે જણાવ્યું હતું કે 9 ઓગસ્ટનાં દિવસે એક ડિપ્રેશન (Depression) સર્જાશે. અને ત્યાર પછી 21 તારીખે પણ એક મજબૂત સિસ્ટમ બનશે. અંબાલાલે જણાવ્યું હતું કે આ ઉપરાંત વિન્ડ ગસ્ટ (Wind gust) પણ જબરું રહેશે. તારીખ 7,8,9 માં વિન્ડ ગસ્ટ જબરદસ્ત રહેશે. અને ભેજનાં લીધે વરસાદ થવાની સંભાવના છે. આગામી તારીખ 9 થી 13 દરમિયાન વરસાદ આવવાની સંભાવના છે.
પૂર્વ ભારતમાં વધુ વરસાદ થવાની શક્યતા છે. આ સિવાય મધ્ય ભારતમાં પણ વરસાદ થશે. અંબાલાલ પટેલે ખેડૂતો માટે કહ્યું હતું કે આશ્લેશા નક્ષત્ર કૃષિ પાકો માટે સારું ગણાતું નથી. આશ્લેશા નક્ષત્રમાં મોટા ફોરાંનો વરસાદ ચાલુ રહેશે. આ નક્ષત્ર ઊભા પાકો કે પાક ઉગાડવા માટે સારું નથી. ત્યાર પછી બંગાળની ખાડીમાં 21 તારીખે એક મજબૂત સિસ્ટ બનશે.
તો બીજી તરફ અંબાલાલ પટેલે ગરમીને લઈને કહ્યું હતું કે ઓગસ્ટ મહિનામાં ગરમી ચાલુ રહેશે. સપ્ટેમ્બર માસમાં પણ ગરમીનું પ્રમાણ વધારે રહેવાની શક્યતા છે. અંબાલાલ પટેલે આગળ જણાવ્યું કે 17 તારીખ પછીનું વરસાદી પાણી સારું હશે. તારીખ 13 સપ્ટેમ્બરથી 25 ઓકટોબર સુધી ગરમી ચાલુ રહેશે. 23 સપ્ટેમ્બરથી અકળાવનારી ગરમી વધશે.
ઓકટોબર મહિનામાં ચક્રવાતની પ્રક્રિયા શરૂ થઈ જશે. નવેમ્બર અને ડિસેમ્બરમાં બંગાળનાં ઉપસાગરમાં ચક્રવાત રહેશે. તે 18-19 અને 20 નવેમ્બરથી ડિસેમ્બરની શરૂઆત સુધી રહી શકે તેવી સંભાવના છે. અંબાલાલની આગાહી મુજબ આઠ ઓગસ્ટનાં દિવસે વરસાદનું જોર વધવાની શક્યતા છે. દક્ષિણ ગુજરાતના વલસાડ, આહવા, નવસારી, ભરૂચ ડાંગ, સુરત તથા સૌરાષ્ટ્રના ભિન્ન ભિન્ન ભાગોમાં વરસાદી ઝાપટા પડશે.
ગુજરાત રાજ્યનાં બીજા એક જાણીતા હવામાન નિષ્ણાંત પરેશ ગોસ્વામીએ જણાવ્યું કે હાલ વરસાદની પર્ટન ચેન્જ થઇ રહી છે, જેના કારણે ઉત્તર અને પૂર્વ મધ્ય ગુજરાતમાં પણ વરસાદનું પ્રમાણ વધી જશે. 15થી 30 ઓગસ્ટ સુધીમાં દક્ષિણ ગુજરાતમાં અને સૌરાષ્ટ્રમાં વરસાદ જોવા મળશે. ઓગસ્ટ મહિનાના પાછળના સપ્તાહમાં ઉત્તર ગુજરાતના સાબરકાંઠા, પાટણ, બનાસકાંઠા, મહેસાણા અરવલ્લી જેવા વિસ્તારોમાં ભારે વરસાદની સંભાવના છે.