આજે મલેશિયન પામ ઓઈલના વાયદામાં લગભગ 6 ટકાનો વધારો થયો હતો. યુએસ સોયાબીન પાકને લગતી આગાહીઓ અને મુખ્ય ખરીદદાર ભારતમાં પામ તેલની મજબૂત માંગને કારણે આ વધારો થયો હતો. મલેશિયા ડેરિવેટિવ્ઝ એક્સચેન્જ પર નવેમ્બર ડિલિવરી માટે પામ તેલના કોન્ટ્રાક્ટ પણ સતત ત્રીજા સત્રમાં વધ્યા હતા. રિંગિટ 217 પોઈન્ટ અથવા 5.89% વધીને 3,900 ($865.51) પ્રતિ ટન થઈ ગઈ. છેલ્લા 6 અઠવાડિયામાં એક દિવસમાં આ સૌથી મોટો વધારો છે.
ભારતમાં એક અગ્રણી વેપારી સંસ્થાએ જણાવ્યું હતું કે ઓગસ્ટમાં દેશમાં પામ તેલની આયાત એક મહિના અગાઉની સરખામણીમાં 87 ટકા વધીને 11 મહિનાની ટોચે પહોંચી છે. ભાવમાં ઘટાડાથી રિફાઇનર્સે ખરીદીમાં વધારો કર્યો હતો. વિશ્વના વનસ્પતિ તેલના સૌથી મોટા ગ્રાહક ભારતમાં પામ તેલની માંગ ઓક્ટોબરમાં તહેવારોની મોસમ પહેલા આ મહિને વધવાની ધારણા છે. કાર્ગો સર્વેયરોએ જણાવ્યું હતું કે પામ ઓઈલની નિકાસ 1 થી 10 સપ્ટેમ્બર વચ્ચે 9.3% થી 25.5% ની વચ્ચે વધી છે. બીજી તરફ જો પામ ઓઈલના ભાવમાં આ વધારો ચાલુ રહેશે તો ખાદ્યતેલના સ્થાનિક ભાવમાં વધારો થઈ શકે છે.
ડેટા દર્શાવે છે કે ઓગસ્ટના અંતમાં મલેશિયામાં પામ ઓઈલનો સ્ટોક 33 મહિનાના સૌથી ઊંચા સ્તરે પહોંચ્યો હતો કારણ કે માંગ સતત વધી રહી હતી. સીજીએસ-સીઆઈએમબી રિસર્ચના પ્લાન્ટેશન રિસર્ચના પ્રાદેશિક વડા આઈવી એનજીએ જણાવ્યું હતું કે સપ્ટેમ્બરમાં પણ પામ ઓઈલનું ઉત્પાદન વધવાની ધારણા છે અને ઈન્વેન્ટરીઝ 9.2% વધીને 2.29 મિલિયન ટન થઈ શકે છે. ભારત અન્ય દેશોમાંથી જે ખાદ્ય તેલની આયાત કરે છે તેમાં પામ ઓઈલનો સૌથી વધુ હિસ્સો છે અને આ આંકડો લગભગ 60 ટકા છે. જ્યારે સોયાબીન તેલ અને સૂર્યમુખી તેલનો હિસ્સો અનુક્રમે 25 અને 12 ટકા છે.