IMD Ahmedabad And Ambalal Patel: હવામાન વિભાગ (Meteorological Department) દ્વારા રાજ્યમાં આગામી 5-7 દિવસમાં ભારે વરસાદ ન હોવાની શક્યતાઓ વ્યક્ત કરી હતી. હવામાન વિભાગે રાજ્યના કેટલાક ભાગોમાં હળવો વરસાદ રહેવાની સંભાવના વ્યક્ત કરી છે. જેમાં દક્ષિણ ગુજરાત, મધ્ય ગુજરાત, ઉત્તર ગુજરાત તથા સૌરાષ્ટ્રના ભાગોનો સમાવેશ થાય છે. હવામાન વિભાગે રાજ્ય પર કોઈ વરસાદી સિસ્ટમ એક્ટિવ ન હોવાનું પણ જણાવ્યું હતું. તો બીજી તરફ અંબાલાલ દ્વારા રાજ્યના કેટલાક ભાગોમાં વરસાદ આપનારી વિશાળ સિસ્ટમની અસર થવાની શક્યતાઓ વ્યક્ત કરી છે. જેમાં તેમણે ચાલુ અઠવાડિયાના અંતમાં તથા આગામી અઠવાડિયા દરમિયાન કેટલાક ભાગોમાં ભારે વરસાદ થવાની સંભાવના જણાવી છે.
હવામાન કેન્દ્રના ડિરેક્ટર ડૉ. મનોરમા મોહંતીએ (Dr. Manorama Mohanty) શુક્રવારે આગાહી કરીને કહ્યું હતું કે, રાજ્યમાં હમણાં ભારે વરસાદની કોઈ સંભાવના નથી. જે વરસાદી સિસ્ટમ બની હતી તે ઉત્તરપશ્ચિમ તરફ ગતિ કરી રહી છે. જેના કારણે ઓરિસ્સા, ઉત્તરપ્રદેશ સહિતના ભાગોમાં ગતિ કરશે જેના લીધે ગુજરાતમાં ભારે વરસાદની સંભાવના નથી.
હવામાન વિભાગે અમદાવાદમાં પણ હળવો વરસાદ રહેવાની સંભાવના જણાવી છે. જેમાં ગઈકાલે રાત્રે તથા આજે વહેલી સવારે કેટલાક ભાગોમાં હળવા વરસાદી છાંટા જોવા મળ્યા હતા. આ જ રીતે ગાંધીનગર (Gandhinagar) સહિતના ભાગોમાં પણ હળવો વરસાદ થયો હતો. ડૉ. મોહંતીએ માછીમારોને 5-7 દિવસ સુધી દરિયો ન ખેડવાની ચેતવણી આપી હતી. દરિયામાં ભારે પવનો તથા દરિયો તોફાની રહેવાની સંભાવનાઓને લીધે માછીમારોને દરિયો ખેડવાની સુચના આપવામાં આવી છે.
અંબાલાલ પટેલ ( Ambalal Patel) જણાવે છે કે બંગાળની ખાડીમાં બનેલુ ડીપ ડિપ્રેશનનો ઘેરાવો મોટો છે, જેને લીધે રાજ્યના વિવિધ ભાગોમાં ભારે વરસાદની સંભાવના છે. આ સાથે આ સિસ્ટમની અસર આડકતરી રીતે ગુજરાત પર પણ જોવા મળી શકે છે. અંબાલાલે તારીખ 5 અને 6 ઓગસ્ટ માટે કરેલી આગાહીમાં જણાવ્યું છે કે, ગુજરાતના ભિન્ન-ભિન્ન ભાગોમાં વરસાદ થવાની સંભાવના છે. કેટલાક ભાગોમાં ભારે વરસાદ પણ થઈ શકે છે.
અંબાલાલે અમદાવાદ, ગાંધીનગર, નવસારી, ભરૂચ સહિતના ભાગોમાં વરસાદી વાતાવરણ રહેવાની સંભાવના જણાવી છે. સૌરાષ્ટ્રના ભાગોમાં પણ વરસાદની સંભાવનાઓ છે. આ વહન જબરું છે અને તેનો ઘેરાવો મોટો છે, આ વહનથી ઉત્તરપ્રદેશના ભાગોમાં પણ ભારે વરસાદની શક્યતાઓ છે.