Gujarat Weather Update : હવે ચોમાસું વિદાઈ લઈ રહ્યું છે, ત્યારે હવામાન વિભાગે આગાહી કરી છે. રાજ્યના અમુક જિલ્લામાંથી ચોમાસાની વિદાય થઈ ચૂકી છે. જ્યારે અમુક જિલ્લામાં સામાન્ય વરસાદની સંભાવના વ્યક્ત કરવામાં આવી છે. હવામાન વિભાગે આગાહી કરતા જણાવ્યું છે કે, ‘ગુજરાતના કચ્છ, ઉત્તર ગુજરાત અને સૌરાષ્ટ્રના અમુક જિલ્લામાંથી ચોમાસાએ વિદાય લઈ લીધી છે. જેને લીધે હવે વાતાવરણ સૂકું બની રહેશે. ત્યારબાદ આગામી 2-3 દિવસમાં વધુ કેટલાક જિલ્લામાંથી ચોમાસું વિદાય લે તેવી સાનુકૂળ સ્થિતિ બની રહી છે.’
તેમણે આગળ જણાવ્યું છે કે, ‘ ગુજરાતના ઉપરના ભાગમાંથી ચોમાસાની વિદાય થઈ ગઈ છે, અને નીચેનો ભાગ એટલે કે દક્ષિણ ગુજરાતમાં સુરત, નવસારી, તાપી, ડાંગ, નવસારી, વલસાડ તેમજ સૌરાષ્ટ્રના અમરેલી, ગીર-સોમનાથ, ભાવનગર અને જૂનાગઢમાં સામાન્ય વરસાદની આગાહી કરવામાં આવી છે.
ચોમાસું શરૂ થવાના માપદંડ હોય છે, તેવી જ રીતે વિદાયના પણ માપદંડ હોય છે. વિદાયના માપદંડ પૂરા થયા બાદ ચોમાસું વિદાય લેવાની જાહેરાત કરતા હોય છે. જેમાં ભેજમાં સતત ઘટાડો થતો જશે, અને સૂર્યપ્રકાશનું રિફ્લેક્શન વધતું જશે. તેમજ પવનની દિશા બદલાઈને ઉતર-પૂર્વ થશે. ત્યાર પછીથી ચોમાસું વિદાય લેવાની શરુઆત થતી હોય છે.’
ચોમાસાની વિદાય પછી જે વરસાદ થાય તેને માવઠું કહેવામાં આવે છે, અથવા તો તેને પાછોતરો વરસાદ પણ કહેવામાં આવે છે, અને ઉપર ભેજ રહી ગયો હોય તેના કારણે વરસાદ થતો હોય છે. જો કે, રાજ્યમાં બેવડી ઋતુનો અહેસાસ થવાનો શરૂ થઈ ગયો છે. બપોરે ઉનાળાની ગરમી જેવો અહેસાસ થાય રહ્યો છે. જો કે વહેલી સવારે વાતાવરણ ઠંડુ બની જાય છે.