Cricket News : ઝિમ્બાબ્વેના ( Zimbabwe) ભૂતપૂર્વ કેપ્ટન અને લેજન્ડરી ક્રિકેટર હીથ સ્ટ્રીકનું (heath streak) 49 વર્ષની વયે અવસાન થયું છે. તેઓ છેલ્લા કેટલાક સમયથી કેન્સરથી પીડાતા હતા. તે આઈપીએલમાં કોલકાતા નાઈટ રાઈડર્સના બોલિંગ કોચ રહી ચૂક્યા છે. તેણે છેલ્લી આંતરરાષ્ટ્રીય મેચ વર્ષ 2005માં રમી હતી. સાઉથ આફ્રિકામાં હીથ સ્ટ્રીકની સારવાર ચાલી રહી હતી. લાંબા સમય સુધી સ્ટ્રીકની સાથે રમનારા ફાસ્ટ બોલર હેનરી ઓલાંગા, વર્તમાન કેપ્ટન સીન વિલિયમ્સ, ભારતીય ક્રિકેટરઆર.અશ્વિન સહિત અન્યોએ સોશિયલ મીડિયા પર આ ખેલાડીના નિધન પર શોક વ્યક્ત કર્યો હતો.
હેનરી ઓલાંગાએ લખ્યું છે કે દુ:ખદ સમાચાર આવી રહ્યા છે કે હીથ સ્ટ્રીક હવે રહ્યો નથી. તે અમારો સૌથી મહાન ઓલરાઉન્ડર હતો. તમારી સાથે રમવાની મજા આવી. સીન વિલિયમ્સે લખ્યું હતું કે મારી પાસે શબ્દો નથી. તમે અને તમારા પરિવારે મારા માટે અને બીજા ઘણા લોકો માટે શું કર્યું છે તે હું સમજાવી શકતો નથી. અમારા દિલ તૂટી ગયા છે. તમે અમારી પાછળ એક સુંદર કુટુંબ અને અમારા માટે જીવવાનો વારસો છોડી ગયા છો. તમને યાદ કરશે, અમે તમને ખૂબ જ પ્રેમ કરીએ છીએ, તમારા આત્માને શાંતિ મળે સ્ટ્રીકી. આ સાથે જ આર અશ્વિને લખ્યું હતું કે હીથ સ્ટ્રીક નથી. ખૂબ જ દુ:ખદ.
65 ટેસ્ટ અને 189 વનડે રમ્યા
હીથ સ્ટ્રીકે ઝિમ્બાબ્વે માટે 65 ટેસ્ટ અને 189 વનડે રમી હતી. ઓલરાઉન્ડર તરીકે તેનું પ્રદર્શન શાનદાર હતું. આ ફાસ્ટ બોલરે ટેસ્ટમાં 216 વિકેટ લીધી હતી. 73 રનમાં 6 વિકેટ શ્રેષ્ઠ પ્રદર્શન હતું. 7 વખત 5 વિકેટ લીધી. આ સિવાય તેણે એક સદી અને 11 અડધી સદીની મદદથી 1990 રન પણ બનાવ્યા હતા. તેનું સર્વશ્રેષ્ઠ પ્રદર્શન અણનમ 127 રન હતું. ODI રેકોર્ડની વાત કરીએ તો સ્ટ્રીકે 239 વિકેટ લીધી હતી. 32 રનમાં 5 વિકેટ શ્રેષ્ઠ પ્રદર્શન હતું. આ ઉપરાંત 13 અડધી સદીના આધારે 2943 રન બનાવ્યા છે.
ઝિમ્બાબ્વેનો એકમાત્ર ક્રિકેટર
હીથ સ્ટ્રીક ટેસ્ટ ક્રિકેટમાં 1000 હજારથી વધુ રન અને 100થી વધુ વિકેટ લેનાર એકમાત્ર ક્રિકેટર છે. 2021માં ICCએ ભ્રષ્ટાચારના કારણે તેના પર 8 વર્ષનો પ્રતિબંધ મૂક્યો હતો. તે ઝિમ્બાબ્વેનો સૌથી સફળ ODI કેપ્ટન છે.