રાજ્યમાં ચાર દિવસ ભારે વરસાદની આગાહી હવામાન વિભાગે આપી છે. ત્યારે અમદાવાદના વાતાવરણમાં પલટો જોવા મળી રહ્યો છે. બપોર બાદ કાળા ડિબાંગ વાદળોથી આકાશ ઘેરાયેલું જોવા મળ્યું હતું. સાંજના સમયે અચાનક શહેરના મોટાભાગના વિસ્તારોમાં ધોધમાર વરસાદ શરૂ થયો હતો. આથી રસ્તાઓ પણ પાણીમાં ગરકાવ થઈ ગયા હતા.
વાહન ચાલકોના વાહનો થયા બંધ
શહેરના થલતેજ, પ્રહલાદનગર, વેજલપુર, પાલડી, શિવરંજ, SG હાઈવે, બોડકદેવ, વસ્ત્રાપુરની સહિતના વિસ્તારમાં ધોધમાર વરસાદ પડ્યો હતો. તો શિવરંજની ચાર રસ્તા પાસે પાણી ભરાતા અનેક વાહન ચાલકોને હાલાકીનો પણ સામનો કરવો પડ્યો હતો.તેમજ રસ્તા પર વરસાદી પાણી ભરાતા અનેક વાહનો બંધ પડી જતાં લોકોએ ધક્કામારીને પાણીમાંથી વાહનો બહાર કાઢવાનો વારો આવ્યો હતો.
આ પણ વાંચો
વરસાદ પડવાથી ખેડૂતોમાં ખુશીની લહેર
દક્ષિણ ગુજરાતમાં પણ વરસાદી માહોલ જામ્યો છે. દક્ષિણમાં સુરત, વલસાડ, અને તાપી જિલ્લાના અનેક તાલુકાઓમાં વરસાદી માહોલ જોવા મળ્યો હતો. ખાસ કરીને સુરતમાં વરસાદના કારણે રસ્તાઓ પર પાણી ભરાઈ ગયાં હતાં. જેથી રાહદારીઓ અને વાહન ચાલકોને હાલાકીનો સામનો કરવો પડ્યો હતો. જોકે વરસાદની શરૂઆતના કારણે ખેડૂતોમાં ખુશીનો માહોલ જોવા મળ્યો હતો અને આગામી વર્ષ સારું જવાની પણ ખેડૂતોમાં આશા બંધાઈ છે.