મહારાષ્ટ્રના અકોલામાં બે સમુદાયો વચ્ચે હિંસક અથડામણ થઈ હતી. આ દરમિયાન બદમાશોએ તોડફોડ સાથે આગચંપી શરૂ કરી દીધી હતી. આ અથડામણમાં એક વ્યક્તિનું મોત થયું હતું, જ્યારે એક પોલીસકર્મી સહિત ત્રણ લોકો ઘાયલ થયા હતા. વિસ્તારમાં તણાવ વચ્ચે કલમ-144 લાગુ કરવામાં આવી છે. પોલીસે સ્થિતિને કાબૂમાં લેવા બળપ્રયોગ કર્યો છે.
મહારાષ્ટ્રના અકોલામાં જૂના શહેરમાં બે સમુદાયના લોકો વચ્ચે અથડામણ થઈ હતી, જે બાદ ઉગ્ર પથ્થરમારો થયો હતો. આ દરમિયાન બદમાશોએ અનેક વાહનોની તોડફોડ કરી હતી. ત્યાં અનેક વાહનોને આગ ચાંપી દેવામાં આવી હતી. બે જૂથો વચ્ચેની અથડામણમાં એક વ્યક્તિનું મોત થયું હતું, જ્યારે એક પોલીસકર્મી સહિત ત્રણ લોકો ઘાયલ થયા હતા. ઘટનાની જાણ થતાં જ મોટી સંખ્યામાં પોલીસ દળ વિસ્તારમાં પહોંચી ગયું હતું. અહીં કલેક્ટરે કલમ 144 લગાવી છે.
મળતી માહિતી મુજબ, મહારાષ્ટ્રના અકોલામાં શનિવારે સાંજે ઈન્સ્ટાગ્રામ પર એક વિવાદાસ્પદ પોસ્ટ કરવામાં આવી હતી, જેના કારણે ઘણા લોકો એકઠા થઈ ગયા અને પોલીસ સ્ટેશન પહોંચ્યા અને ફરિયાદ નોંધાવી. પોલીસે આ મામલે ગુનો નોંધ્યો હતો. દરમિયાન પોલીસ સ્ટેશને પહોંચેલા ટોળાએ બેકાબૂ બનીને વાહનોની તોડફોડ શરૂ કરી હતી.
હિંસક ટોળાએ અનેક વાહનોને આગ ચાંપી, ભારે તોડફોડ કરી
આ જોઈને ભીડે પથ્થરમારો કર્યો અને અનેક વાહનોને આગ ચાંપી દીધી. આ દરમિયાન અન્ય એક જૂથ પણ આગળ આવ્યું અને બંને પક્ષો વચ્ચે એક કલાક સુધી પથ્થરમારો ચાલુ રહ્યો. હિંસક ટોળાએ અહીં તોડફોડ કરી છે. પરિસ્થિતિને કાબૂમાં લેવા માટે અન્ય જિલ્લાઓમાંથી ભારે પોલીસ ફોર્સ બોલાવવામાં આવી છે.
આ ઘટના જૂના શહેરના ગંગાધર ચોક, પોલા ચોક, હરિહર પેઠ વિસ્તારની ટાઉનશીપમાં બની હતી. અહીં બે સમુદાયો સામસામે આવી ગયા અને એકબીજા પર પથ્થરમારો કરવા લાગ્યા અને અનેક વાહનોમાં તોડફોડ કરી આગ ચાંપી દીધી. બદમાશોએ પોલીસ વાહન તેમજ ફાયર એન્જિન પર પથ્થરમારો કર્યો હતો, જેમાં ઘણા ફાયર કર્મીઓ ઘાયલ થયા હતા.
પોલીસે હિંસક ટોળાને કાબૂમાં લેવા ટીયર ગેસના શેલ છોડ્યા હતા
પોલીસે સ્થિતિને કાબૂમાં લેવા માટે ટીયર ગેસના શેલ છોડ્યા હતા. આ સાથે અકોલા જિલ્લાની આસપાસના વાશિમ, બુલઢાણા, અમરાવતીથી પણ પોલીસ ફોર્સ બોલાવવામાં આવી હતી. પોલીસની બે કંપનીઓએ તોફાનીઓની ઓળખ કરીને તેમની ધરપકડ કરવાનું શરૂ કર્યું છે. એડિશનલ એસપી મોનિકા રાઉતે જણાવ્યું કે અત્યાર સુધી પોલીસે આ કેસમાં 15 લોકોને કસ્ટડીમાં લીધા છે.
કલેક્ટરના આદેશ પર અકોલા શહેરમાં કલમ 144 લાગુ કરવામાં આવી છે. એડિશનલ એસપી મોનિકા રાઉતે કહ્યું કે આ કેસમાં 15 લોકોની અટકાયત કરવામાં આવી છે. તેમણે જણાવ્યું કે લગભગ 7 થી 8 વાહનોમાં તોડફોડ કરવામાં આવી છે. અત્યારે સ્થિતિ નિયંત્રણમાં છે.