માનવી 150 વર્ષથી વધુ સમયથી અવકાશના અન્ય ભાગમાં એલિયન્સ સાથે જોડાવા માટે પ્રયાસ કરી રહ્યો છે. જો કે અત્યાર સુધી તે અસફળ રહ્યો છે અથવા ઓછામાં ઓછી એવી કોઈ જાહેર માહિતી ઉપલબ્ધ નથી કે જે એલિયન્સ સાથેના સંપર્કની પુષ્ટિ કરે. આવી સ્થિતિમાં વૈજ્ઞાનિકો હવે એલિયન્સનો સંપર્ક કરવાની નવી રીત પર કામ કરી રહ્યા છે.
આ પ્રોજેક્ટ પર કામ કરી રહેલી ટીમના જણાવ્યા અનુસાર તેઓને આશા છે કે પૃથ્વીના વાતાવરણમાંથી બે નગ્ન લોકોની તસવીર બ્રહ્માંડમાં મોકલીને તેઓ એલિયન્સની જિજ્ઞાસા જગાડી શકશે અને તેમની સાથે વાતચીતને પ્રોત્સાહિત કરી શકશે. અહેવાલ મુજબ વૈજ્ઞાનિકોના એક જૂથે એક ખાસ સંદેશ વિકસાવ્યો છે જે એલિયન્સને આકર્ષવા માટે મોકલવામાં આવશે. તેમાં એક નગ્ન પુરુષ અને સ્ત્રીની તસવીર પણ સામેલ છે જેમાં તેઓ હાથ હલાવતા જોવા મળે છે.
પિક્સલેટેડ ફોટોગ્રાફ્સ ઉપરાંત ગુરુત્વાકર્ષણ અને ડીએનએની છબી પણ આ અભિયાનમાં સામેલ કરવામાં આવી છે. વૈજ્ઞાનિકો માને છે કે એલિયન્સ આવા મોટાભાગના બાઈનરી-કોડેડ સંદેશાને સમજી શકે છે. વૈજ્ઞાનિકોના મતે તેઓએ આ ચિત્રોને અવકાશમાં મોકલવાનું પસંદ કર્યું કારણ કે શક્ય છે કે એલિયન્સનો સંદેશાવ્યવહારનો માર્ગ માનવીઓ કરતા સંપૂર્ણપણે અલગ હોય. આ પ્રોજેક્ટ પર કામ કરી રહેલા વૈજ્ઞાનિકોના જણાવ્યા અનુસાર ‘પ્રસ્તાવિત સંદેશમાં સંચારનું માધ્યમ બનાવવા માટે મૂળભૂત ગાણિતિક અને ભૌતિકશાસ્ત્રના ખ્યાલોનો સમાવેશ કરવામાં આવ્યો છે.
તે એક માસ્ટર પ્લાન જેવું છે જેમાં પૃથ્વી પરના જીવનની બાયોકેમિકલ રચના, આકાશગંગામાં સૂર્યમંડળની સ્થિતિ તેમજ તેની અને પૃથ્વીની સપાટીની ડિજિટલ માહિતી પણ આપવામાં આવી છે. આ પહેલીવાર નથી જ્યારે વૈજ્ઞાનિકોએ અવકાશમાં મનુષ્યની નગ્ન તસવીરો મોકલવાનો પ્રયાસ કર્યો હોય. 1972માં પાયોનિયર 10 મિશન અને 1973માં પાયોનિયર 11 મિશન દરમિયાન પણ આવી તસવીરો મોકલવામાં આવી હતી. જેના કારણે એલિયન્સને ઊંડો સંદેશ આપવાનો પ્રયાસ કરવામાં આવ્યો હતો.