કેટલાક સમય પહેલાં ભાવનગર જિલ્લામાં રખડતા ઢોરને કારણે પણ યુવાનનું મોત થયું હતુ. ત્યારે ગાંધીનગરમાં એસપી કચેરી પાસે અચાનક ગાય સામે આવતા તેને બચવા માટે ટુવ્હીલર ચાલક 26 વર્ષીય નિહાલ શાહે એક્ટિવાને બ્રેક મારી હતી. તે સાથે જ તે નીચે પડી ગયો હતો. જેમા તેનું મોત થયું હતું. પરંતુ અહીં એક અજીબ ઘટના એ ઘટી કે માતાએ મૃતક દીકરા સામે જ ગુનો નોંધાવ્યો હતો.
આ ઘટનામાં બાઈક પાછળ બેઠેલી માતાને પણ ઇજા પહોંચી હતી. આ અકસ્માત ગુરુવારે થયો હતો. જ્યારે નિહાલ અને તેના માતા મંજુલા શાહ (52) સેક્ટર 24 તરફ ટુ વ્હીલર પર જતા હતા. જ્યારે તેઓ ગાંધીનગરમાં એસપી ઓફિસ પાસે પહોંચ્યા ત્યારે એક ગાય રસ્તા પર અચાનક આવી ગઇ હતી. જેના કારણે યુવાને બ્રેક મારી હતી. બ્રેક મારતાની સાથે જ યુવાન વાહન પરથી કાબૂ ગુમાવીને નીચે પડી ગયો હતો. તેના કારણે તે તેમજ તેના માતા રસ્તા પર પટકાયા હતા. જે બાદ તે બંનેને હોસ્પિટલમાં સારવાર માટે દાખલ કરવામાં આવ્યા.
પરંતુ બદ નસીબે યુવાનને માથા પર ગંભીર ઇજા વધારે હતી જેથી તેને ખાનગી હોસ્પિટલમાં ટ્રાન્સફર કરાયો હતો. જ્યાં તેણે શનિવારે અંતિમ શ્વાસ લીધા હતા. જે બાદ તેની માતાએ સેક્ટર 21માં પોલીસ ફરિયાદ નોંધાવી હતી. આ માટે તેમણે પોતાના દીકરાને જ જવાબદાર ગણાવ્યો હતો. માતાએ પુત્રના જ બેદરકારીભર્યા ડ્રાઈવિંગના કારણે ઘટના બની હોવાનું કહ્યું હતું. ત્યારે હવે પોલીસમાં આ ગુનો નોંધાયા છે અને આગળની કાર્યવાહી કરવામાં આવી રહી છે.