મહિલાઓ, બાળકો અને વૃદ્ધોએ યુદ્ધની સૌથી વધુ કિંમત ચૂકવવી પડે છે. યુક્રેનમાં પણ આવું જ થઈ રહ્યું છે. રશિયન સેના યુક્રેન પર તબાહી મચાવી રહી છે. ઘણા શહેરો અને નગરો ખંડેરમાં ફેરવાઈ ગયા છે. ઘણા શહેરોમાંથી સ્થળાંતર ચાલુ છે. આ દરમિયાન સમાચાર આવી રહ્યા છે કે હવે રશિયન સૈનિકો યુક્રેનની મહિલાઓને ધમકાવી રહ્યા છે અને રેપ કરી રહ્યા છે. જો મહિલાઓ ના પાડે તો તેઓ તેમના પતિ અને બાળકોને મારી નાખવાની ધમકી આપે છે. કેટલાક કિસ્સાઓમાં વિરોધ કરવા પર બળાત્કાર પીડિતાના પતિને રશિયન સૈનિકે ગોળી મારી દીધી હતી.
યુક્રેનમાં બંદૂકની અણી પર બળાત્કારની ઘટનાઓ વધી છે. યુક્રેનના ઓમ્બડ્સમેન ફોર હ્યુમન રાઈટ્સ લ્યુડમીલા ડેનિસોવાએ જણાવ્યું કે તે આવા કેસનું દસ્તાવેજીકરણ કરી રહી છે. તેણે કહ્યું- ’14 થી 24 વર્ષની 25 છોકરીઓ સાથે બળાત્કાર થયો હતો. આ બધું બુચાના એક ઘરના ભોંયરામાં થયું હતું. જેમાંથી 9 ગર્ભવતી બની હતી. લ્યુડમાયલા ડેનિસોવાએ પણ કહ્યું- ’25 વર્ષની એક મહિલાએ ફોન કરીને કહ્યું કે તેની 16 વર્ષની બહેન પર તેની સામે જ શેરીમાં બળાત્કાર થયો હતો.
યુક્રેનની આવી જ એક ઘટનાએ દુનિયાભરના મીડિયામાં હેડલાઈન્સ બનાવી છે. મહિલા કહે છે, ‘તે મને બંદૂકની અણી પર નજીકના ઘરમાં લઈ ગયો, તેણે મને કહ્યું- તારા કપડાં ઉતાર, નહીંતર હું તને ગોળી મારી દઈશ, તે મને સતત ધમકીઓ આપતો હતો. જે બાદ તેણે બળાત્કાર કર્યો’. જ્યારે મહિલાના પતિએ વિદેશી સૈનિકનો વિરોધ કર્યો તો તેના પતિને ગોળી વાગી હતી. ઈજાગ્રસ્ત હોવા છતાં, પતિને હોસ્પિટલ લઈ જવો શક્ય ન હતો, જેના કારણે બે દિવસ પછી તેનું મૃત્યુ થયું. આ પછી સૈનિકે તેને ધમકી આપી અને બળાત્કાર કર્યો.
વિદેશી સૈનિક દ્વારા બળાત્કારનો ભોગ બનેલી યુક્રેનિયન મહિલાના આ દર્દનાક શબ્દો છે. પીડિતાએ જણાવ્યું કે આ ઘટના 7 માર્ચે બની હતી. જ્યારે તે તેના ઘરની અંદર હતી. તેની સાથે તેનો પતિ પણ હાજર હતો. તે કિવથી 70 કિમી દૂર રહે છે. પોતાની દર્દનાક વાર્તા સંભળાવતી વખતે આ મહિલાના આંસુ છલકાઈ ગયા. જો કે, આ વાર્તા કોઈ એક યુક્રેનિયન મહિલાની નથી, આવી ઘટનાઓ યુક્રેનની ઘણી મહિલાઓ સાથે બની છે.
અન્નાએ હુમલાખોરના દેખાવ વિશે કહ્યું – તે એક યુવાન, પાતળો, ચેચેનિયન ફાઇટર જેવો દેખાતો હતો. અન્ના કહે છે કે રશિયન સૈનિકોના એક જૂથે તેમને બચાવવાનું કામ કર્યું હતું. જ્યારે અન્ના ઘરે પાછી ગઈ ત્યારે તેણે જોયું કે તેના પતિના પેટમાં ગોળી વાગી હતી. અન્ના કહે છે, ‘તેણે (પતિએ) મને બચાવવાનો પ્રયાસ કર્યો, પરંતુ તેને ગોળી મારી દેવામાં આવી. અમે અમારા પડોશીઓ પાસે આશ્રય લીધો. યુદ્ધ ચાલી રહ્યું હોવાથી પાડોશીઓ પણ પતિને હોસ્પિટલ લઈ જઈ શક્યા ન હતા. તે (પતિ) બે દિવસ ઘાયલ થયા બાદ મૃત્યુ પામ્યો.
અન્નાએ એ પણ જણાવ્યું કે જે સૈનિકોએ તેમને બચાવ્યા તેઓ થોડા દિવસ ઘરમાં રહ્યા. તેઓ ગયા ત્યારે મને દવાઓ અને વાયગ્રા મળી. તેમાંથી મોટા ભાગના નશામાં ધૂત જણાતા હતા. અન્નાના ઘર પાસે અન્ય 40 વર્ષીય મહિલા પર કથિત રીતે બળાત્કાર ગુજારવામાં આવ્યો હતો. કિવ પ્રદેશના પોલીસ વડા આન્દ્રી નેબિટોવે જણાવ્યું કે તેઓ આવા જ અન્ય એક કેસની તપાસ કરી રહ્યા છે.
આ સ્થળ કિવના પશ્ચિમથી 50 કિમી દૂર છે. એન્ડ્રી નેબિટોવે કહ્યું કે 9 માર્ચે કેટલાક રશિયન સૈનિકો એક ઘરમાં ઘૂસ્યા. આ ઘરમાં એક કપલ અને તેમનું બાળક હતું. જ્યારે વ્યક્તિએ તેની પત્નીને બચાવવાનો પ્રયાસ કર્યો ત્યારે તેને વરંડામાં ગોળી વાગી હતી. આ પછી રશિયન સૈનિકોએ મહિલા સાથે બળાત્કાર કર્યો હતો. સૈનિકોએ ધમકી પણ આપી હતી કે જો તે પ્રતિકાર કરશે તો તેના બાળકને મારી નાખશે. રસ્તામાં આ રશિયન સૈનિકોએ ઘરને આગ લગાડી દીધી. પાલતુ કૂતરાને પણ ગોળી વાગી હતી.