ગુજરાતની લોકપ્રિય સિંગર કિંજલ દવેએ પવન જોષી સાથે એપ્રિલ, 2018માં સગાઈ કરી હતી. તેમની સગાઈને 3 વર્ષથી પણ વધારે સમય થઈ ગયો છે. ત્યારે હવે કિંજલ દવે મંગેતર પવન જોષી સાથે મુંબઈ પહોંચી હતી. મુંબઈમાં બંનેએ ‘તારક મહેતા કા ઉલ્ટા ચશ્મા’ના સેટની પણ મુલાકાત લીધી હતી.
કિંજલ દેવની સાથે તેનો ભાઈ આકાશ દવે પણ જોવા મળ્યો હતો. ત્રણેય સિરિયલમાં ગડા હાઉસ એટલે કે જેઠાલાલના ઘરે ગયા હતા અને હિંચકા પર બેસીને ફોટો પડાવ્યો હતો. હાલ જ પવન જોષીએ સો.મીડિયામાં દિલીપ જોષી (જેઠાલાલ) સાથેની તસવીર શૅર કરીને કહ્યું હતું, ‘અંતે, મારા સૌથી ફેવરિટ એક્ટર તથા કોમેડીના કિંગ દિલીપ જોષી સર સાથે મિટિંગ થઈ.’
કિંજલ-પવન તથા આકાશ બોલિવૂડ તથા ટીવી એક્ટર વિશાલ જેઠવાને પણ મળ્યા હતા. 2013માં ટીવી સિરિયલ ‘ભારત કે વીરપુત્ર’માં અકબરનો રોલ કરનાર વિશાલ ‘મર્દાની 2’માં વિલનના રોલમાં જોવા મળ્યો હતો. વર્ષ 1994મા જન્મેલ 25 વર્ષીય વિશાલ જેઠવા વેબ સિરીઝ ‘હ્યુમન’માં શૈફાલી શાહ સાથે જોવા મળ્યો હતો.
વિશાલ જેઠવાનો પરિવાર મૂળ ગુજરાતના ઉનાના અંબાડા ગામનો છે. વિશાલનું મોસાળ દીવમાં છે, જ્યારે વિશાલના માસા-માસી કોડીનારમાં રહે છે. વિશાલના પિતાનું 2008માં અવસાન થયું હતું.
2018માં કિંજલે ‘દાદા હો દીકરી’થી એક્ટિંગ ડેબ્યૂ કર્યું હતું. 2019માં તે ભારતીય જનતા પાર્ટીમાં જોડાઈ હતી.કિંજલ દવેના વર્કફ્રન્ટની વાત કરીએ તો તેણે છેલ્લે ‘જીવી લે’ સોંગ ગાયું હતું.
