એક વાત તો જોઈ શકાય છે કે આજકાલ વડોદરા શહેર અને જિલ્લામાં શેરી કૂતરાઓનો ત્રાસ દિવસે દિવસે વધી રહ્યો છે. વડોદરા નજીક આવેલા સુંદરપુરા ગામમાં ગયા મહિનાની જ વાત કરીએ તો મે મહિનામાં ઘરની પાછળ સાત વર્ષની બાળકી રમતી હતી દરમિયાન ધસી આવેલા કૂતરાએ તેના ઉપર હુમલો કર્યો હતો અને બાળકીના હાથના અંગુઠાને કાપી ખાધો હતો. ત્યારે હવે ફરીથી એવી જ ઘટના બની છે અને લોકોમાં ચિંતાનો વિષય બન્યો છે. સમતા વિસ્તારમાં આવેલ વૈકુંઠ ફ્લેટની આ ઘટના છે કે જ્યાં ગ્રાઉન્ટ ફ્લોરના ટેનામેન્ટમાં ઘરમાં ઊંઘતી માત્ર પાંચ મહિનાની બાળકી પર કૂતરાએ હુમલો કર્યો. એમાં પણ એવો ખતરનાક હુમલો કે કૂતરાએ બાળકીનું માથું ફાડી નાખ્યું અને તેનું લોહી ચાટતું હતું. જોકે માતાને નજર પડતાં બાળકીને બચાવી લીધી હતી.
હાલમાં બાળકીની હાલત ખુબ ગંભીર છે. અને ગોત્રી મેડિકલ હોસ્પિટલમાં દાખલ કરવામાં આવી છે. વિગતો મળી રહી છે કે મોડી સાંજે સમતા વિસ્તારમાં રખડતા કૂતરાએ બાળકી પર એવો હુમલો કર્યો કે સાંભળનારા પણ ડરી જાય છે. વડોદરાના સમતા વિસ્તારમાં આવેલ વૈકુંઠ ફ્લેટના ગ્રાઉન્ડ ફ્લોરના ટેનામેન્ટમાં રહેતા આશિષ ભરતભાઇ ટેલરે સમગ્ર વાત કરતાં હકીકત જણાવી હતી કે, હું એક પ્રાઇવેટ કંપનીમાં નોકરી કરું છું. મારી પત્ની મારી 5 મહિનાની દીકરી જાન્વીને ઘરમાં ઘોડિયામાં સૂવડાવી અને સાંજે 6 વાગ્યે ઘરની બાજુમાં નળમાં પીવાનું પાણી ભરવા ગઇ હતી. આ દરમિયાન ઘરની જાળી ખુલ્લી રહી ગઇ હતી. જેથી રખડતું કૂતરું ઘરમાં આવી ગયું હતું. ઘરમાં આવી ગયેલા કૂતરાએ ઘોડિયામાં ઉંઘી રહેલી મારી માસૂમ દીકરી પર હુમલો કર્યો.
આશિષભાઈએ આગળ વાત કરી કે આ હુમલો એટલો ભયાનક હતો કે માથું ફાડી નાખ્યું હતું. પાણી ભરવા ગયેલી મારી પત્ની પાંચ મિનિટમાં તો પાછી આવી ગઇ હતી. ઘરમાં આવી તેણે જોયું તો એ ગભરાઇ જ ગઇ કારણ કે કૂતરું મારી દીકરીનું લોહી ચાટી રહ્યું હતું. મારી પત્નીએ હિંમત કરી કૂતરાને ભગાડાવી કોશીશ કરી. પરંતું કુતૂરું ત્યાંથી હટી નહોતું રહ્યું. જેથી મારી પત્ની મારી દીકરીને તેડી ઘરમાંથી બહાર નિકળી ગઇ. છતાં પણ કૂતરું તો ઘરમાં જ હતું.